mga hinungaw sa kasingkasing nga malipayon

unsaon ko man
ang kuhit nga kawayan
nga taas kaayo?

dili ko man kini
magamit sa pagkuhit
sa bulan
ug mga bitoon

unsaon ko man ang
hagdan nga
taas kaayo?

wala ako'y
habog nga adtoon
sama sa
tumoy sa kabukiran

ang akong
gipili mao lamang
ang usa ka
luna sa yuta
diin maigo ang
akong duha ka
tiil

diin maigo ang
akong sampot
sa ako unyang
paglingkod

ang akong
gikinahanglan
mao lamang
ang silong sa
kahoy

usa ka dahon
unya sa akong
pagpamaypay

usa ka talan-awon
diin
magpista ang
akong mga
mata diha
sa kalipay

ang kalipay
gani
dili man usab
kinahanglan
nga kini mas
taas pa sa kuhit
nga kawayan
o mas habog pa
sa hagdanan
nga atong isumpay
sa dili na nato
maabot

mubong kalipay
apan buhong
bisan gani sa
usa ka
gutlo sa orasan
sa kinabuhi

igo na kini
kanako
nga balon
aron ihatod ako
sa laing
kapungkoan