walay manirado walay mangabri

karon nga nakita mo na ang tanang
makita
nga nabati mo na ang tanang mahatag nilang pagbati

karon nga nakaplagan mo na ang mga nawala
natilawan ang ilang natilawan

unsa pa man ang sunod nga angayng mahitabo?

mananap, tawo, diyos?

kalibotan, langit, tawo?

abog, unod, bukog, ispiritu?

motoo ka ba kanako nga ikaw paingon ngadto sa imong dili pa gayod matoohan?

ang mga ang-ang dili magpabilin nga mga ang-ang
sama sa naandan, moabot ka sa usa ka pultahan ug imo kining ablihan
aron mosulod ka sa usa ka lawak arong moabot ka na usab sa usa ka bintana

aron makita mo ang gihanyag sa mga bintana
kadtong dili na maabot sa imong mga mata
kadtong dili na mahikap sa imong mga kamot
kadtong dili na malitok sa imong mga ngabil
kadtong dili na matugkad sa imong hunahuna

dili ka makaingon nga karon dinhi na lamang ako kutob
ug busa ipangumusta mo na lamang ako kanila

dili ka dinhi kutob kay sama kanako kining atong mga kamot ug tiil
kining atong mga panglantaw
mao lamang kini ang mga sinugdanan
sa lain na usab nga ang-ang sa lain na usab nga pultahan
sa lain na usab nga lawak
sa lain na usab nga mga talan-awon nga ihanyag kanato sa mga bintana

walay manirado, walay mangabri.