ang tanan nga dili unta angay nga mahitabo
sama sa pag-abot sa sayong kagabhion
dili na angay pang litokon
sa makadaghan ako lamang kining gilantaw
hangtod nga kini napapas
sa matag tipak kangitngit gipiyong ko ang akong mga mata
andam sa pagtagbo sa pag-abot sa pagpilok sa dyutayng kahayag
ang matag kahayag gihimo ko kining usa ka buluhaton
gani
gipadaghan pa nako ang mga angayang buhaton
gipabug-atan, gipalapdan
gipilopilo, gilikitlikit
sama sa mga habol, sa mga gipamutang sa mga bakat
ug bukag
sa mga dahon sa buyo
sa mga tabako ug budbod
aron lang unta dili nako mabati ang mga nagkamang nga kahaw-ang sa
molabay nga mga oras
sa akong mga panit
sa abaga
ug sa akong mga tudlo
apan ang kahaw-ang madinumtanon
wala ako kalimti niini
kanunay niya akong gisunod-sunod
bisan asa akong dapita
gipadpad ako sa hangin didto sa habagatan
nag-atang na kini kanako
sa mga kakahoyan nga gilangkatan sa ilang
mga dahon
nga gibalian sa ilang mga sanga
mitago ako sa mga panganod
apan ang kahaw-ang nagpaabot na kanako
didto isip usa ka dako kaayong dag-om
nga andam ng nga mopabati kanako kon unsa
kakusog ang ulan
kon unsa kini ka bugnaw
kon unsa kini kasakit
sa matag lusok nga iyang ituslok
sa dughan sa bukid ug dagat
mipatihulog ako sa dakong lawod sa dagat
mitiglom sa salog nga balason, batoon ug mamingaw
apan ang kahaw-ang
nahimong usa ka ngiob
nga nahimong balayan sa akong
tinagoang paghandom
usahay gusto kong tugkaron ang tanan
ilailahon ang akong kaugalingon
kutkuton ang akong kagikan
kon kinsa ba ang akong mga katigulangan
kon kinsa ba gayod ako
ning panghitabo sa akong kalibonan nga kalibotan
nakapangutana ko, namasin
ako? dili ba kaha ako ang kahaw-ang mismo?
ang akong ginikanan? dili ba sila ang magtiayon usab sa kahaw-ang kaniadto?
ang akong Bathala? dili ba usab siya ang
Bathala sa Kahaw-ang?
kon maglinti man
o maglinog
ug kon ako ig-on ug ako moliki
ug masunog
kon ako tunlon sa yuta
ug iluwa
nganong dili ko ba kini
dawaton sa maayong pahigayon?
kay unsa ba usa'y pu's sa kinabuhi
sa matag adlaw
kon ang tanang moabot mao lamang ang
mga kagupa sa kahaw-ang
nga kon imong tutukan
walay mga mata
walay mga baba
ug wala usay mga dunggan.
