paghandom gihapon sa kagahapon

bisan sa usa ka higayon
sud sa usa ka tuig
natong panag-ipon
paaboton ko gihapon ang
imong pag-abot
aron mokuyog ang akong
mga tiil
aron sa makausa pa
akong lakwan
ang mga lugar nga
kanunay nga gihandom
sa akong
mga kaunoran nga karon
nalaksot na
usa usa ka gugma nga
gahian kaayo og
batikolon

asa ka na?

nawala na kaha
ang pobreng panglantaw
nga wala ka naman
nagpakita
kanamo kami nga
giuhaw usab sa imong
paghukas og tapis
sa imong panumduman?

gipangandoy ko ang
paghubo
sa usa ka kamatooran
atubangan sa
akong dughan nga
gibikogan

sa pagbalak

mao kana ang
pagsapnay sa tibook kalibotan
sa usa lamang
ka pulong

unya pagkalami gayod kaayo
nga dili na
gani noon maispiling.

unsay lami anang dili bakak?

wala ka seguro mitoo kanako
kay sa dihang miingon ko
nga ania na ako diri
nagharay-haray sa katre
og lantaw sa TV sa
magandang umaga bayan
samtang mibunok ang
kusog kaayong ulan
sa gawas sa alumni hall
mihangyo ka pa man gayod
nga ako
magpaletrato atubangan nianang
dakong estampa nga
puti og pintal
aron motaplak ang akong
mapailobon nga pahiyom

og aron paghupay sa imong pagduda
akong giletratohan ang
lubot sa cafeteria
og gipadala kanimo
ora mismo

karon, unsay lami anang
dili bakak?

ikaw man god

tan-awa
ang imong nawong
ikaw man god
sa imong kahadlok
nga ikaw
unya matigulang
ikaw hinoon
dali ra kaayong
nahimong
laksot

kalit kaayo ang imong
pagkamaot

mananambal

gikuha niya ang itlog
og nangutana
iyang gikuha ang tubag
sa itlog nga
mitindog
bisan og ang salog
haskang
sinawa

dayon og ingon
nga ang hinungdan
sa imong hubag
nga walay buthanan
mao ang imong
silingan

ugma mangita ka og
paagi nga imong
makuha ang usa niya
ka buhok

aron ikaw unya
makabalos

sama sa usa ka hangin

sa akong pag-inosara
wala na ako makigsulti sa akong kaugalingon
gilantaw ko ang
akong padulngan
wala na ako mangutana kon asa
ang kataposan

kada lakang
akong gisabot nga kini pagsugod lamang
kada hunong
akong gipangandoy nga unta
walay katapusan

mas nindot ang pagtak-om
wala ang kabalaka
mas nindot ang paglutaw-lutaw
kay mawala ang kabug-at

sama sa usa ka dahon
sakyan ko ang hangin
og sama sa usa ka hangin
imo akong angkonon

sa sulod sa akong kasingkasing

sa gawas
makita mo ang dili na
nimo masimhot

lapad ang imong
panabot
og ang imong
makita dili mo na
isulti

sa sulod
gisimhot nimo ang dili
na makita

lalom ang imong panabot
og ang tanan
gipiyongan mo sa
kahilom

daghan ka og makita
sud sa imong
kasingkasing

nga dili na kinahanglan
pang sabton

mga talan-awon sa pagpauli gikan sa unibersidad

karong gabii mao kini
ang mga talan-awon nga
akong nalabyan

sa Miputak
sa kariton natulog ang usa
ka gamay kaayong bata
tupad sa iyang amahan
nga dakog tiyan
nga naghay-ad sa
kahubog
diha sa dalan

sa Sta. Felomina
nanghunong ang mga motorsiklo
dili makalapos kay
hadlok sa dakop
sa TMG dapit sa unahan
walay suga ang uban
walay helmet

sa Galas dunay kagubot
dunay sumbagay sa duha ka
lalaki nga walay t-shirt
nagkadugo ang bukton sa
usa nga natikbasan sa
hait nga sundang
imbis managan ang mga
tawo, nanggitapok man hinoon
morag gustong motan-aw kon
dunay mamatay anang
orasa

sa Olingan dapit sa kurbada
sa Laoy
dunay mga bata nga naggubat-gubat
gamit ang luthang nga ang bala
mao ang bunga sa kapayas

sa Punta bag-ong gitukod
ang checkpoint
og gipahunong ang mga dagkong
ten-wheelers

paglabang nako sa unahan
dapit na sa Dicayo
haskang mingawa na kaayo
ngitngit ang dalan
og ang mga kahoy labong
walay sakyanan
walay mga tawo

mipasutoy ko og padagan
sa akong sakyanan

hadlok ko sa wakwak.

mangutana lang unta ko

mga heler
mangutana lang god unta ko
kon asa ba kamo
padulong?

pagawas ba kamong tanang
sa kangitngit
o pasulod pa ba kamo sa
kahayag?

kasuk-i ako ayaw
apan naglibog lang ko
kon asa ang tinood nga
pultahan

padung sa kahayag

sayod ka ba soledad?

sayod ka ba soledad
nga sa atong pagkagamay
og pagkaubos

ang makapadako
og makapataas kanato

niining atong
gitindogan og gipuy-an

mao na lang gayod ang
atong mga pangandoy?

tuhui ako ayaw
apan mao gayod kana
ang kamatooran
nga nagpabiling
buhi diri
sa nataran sa atong
mga balatian

tambag sa akong estudyante

hijo
pagsugod anang wa kay nahibaw-an

pamati una
ayaw og tingog

dayon tug-ani ko
kon duna ka bay nahibaw-an

4:18 (ikaw nay bahala og tagna)

human og kamata
sa usa ka maot kaayo nga damgo

(nabalian og tiil
ang akong pinalanggang manghod
nga daghang anak
sa gawas)

miabre ko sa ref
og miinom og bugnaw kaayong tubig

dayog abre sa computer
og himo og mga
pabugnaw sa akong kalag nga
nag-alipasa

balak uno
balak dos
balak tres

sus ginoo
miduyog baya ang panahon
kay mibundak ang kusog kaayong ulan
sa atop sa akong balay

makita ko ra
nga ang sandayong
nagkupaskupas og balay unsaon
niya paghakop ang
daghan kaayong mga lusok
sa tubig

sama sa mga kunot sa akong nawong
diin
midagayday ang morag mais kadagko
nga mga luha

sayong kabuntagon

nag-awit ang mga baki
pasalamat sa kusog kaayo nga ulan

sa miaging gabii.
puno ang mga sapa og ang mga isda

naglukso-lukso gustong makita
ang bangaw nga karon lamang mibadlis

sa nindot kaayong mga bulok
sa dili pa kaayo puti nga langit.

sa pagtakdo sa alas dose sa tungang gabii

sa pagtakdo sa alas
dose sa tungang gabii

wala gihapon
ako makatulog

mora bag ikaw na
ang akong nahimong

tinuhuan og sa matag
oras nga ako na lamang

ang nag-ampo diha
sa kamingaw og sa kangitngit

giyukboan ko ang atong
mga kaagi

ang unang halok
nga hangtod karon mao lang

gihapon ang akong
debosyon og ang atong unang

paghanggab sa kalipay sa
atong mga unod nga hangtod

karon dili gayod mapapas
sa akong mga bukton og

sa akong mga paa nga morag
tattoo sa usa ka agila

sa akong pus-on
dili ka iwik sa usa ka kahilom

sa kagabhion

sa kagabhion
didto sa bungtod
sa Bandera

milantaw ko sa
daghan kaayong mga
bitoon

sa tinood lang
ikaw lang gihapon ang
akong gipangita
kanunay

ang imong mga mata
ang imong mga ngabil

panalagsang panagkita

bisan og sa makausa lang
sa usa ka bulan
gusto nakong kitang duha
mahimong
mga trapo sa
salog
aron kining mga lama
makuha
og ang mga kahoy nga
giabogan
mangasinaw

dayon pagkahuman
sa talagsaong higayon
nga atong balikbalikan og
handom
mobalik kita isip mga
nobenahan
sa mga manang didto
sa ilang mga karaang
kapilya

sa usa ka kamatayon sa gugma

ang sugilanon kabahin sa kamatayon sa
gugma
dili na malitok apan sa

paghugas usahay sa imong nawong
diha atubangan sa samin

imong makita ang mga panghitabo
sa paghulma sa imong palad nga morag

mga tasa aron sa makausa pa
mokabo og tubig aron hugasan ang

mga luha diha sa imong aping
sa panghilam-os og sa pagsabon aron

na unta mawagtang ang kasakit
manarapo ka sa labakara og mobalik

og lingkod sa lamesa
og dayon og inom sa usa ka isog nga

kape og tusno sa usa ka pan de sal
og dayon og tutok sa taas kaayo nga dagat

aron bugayon na ang mga pulong, ang
mga larawan, ang mga dili na angay nga hinumduman

sa dalan nga gasanga

sa nagsangang dalan
mahitabo na ang atong gipaabot

hawiran mo ang akong kamot
og mopasalig ka nga

walay daotang mahitabo kanako
og ako usab molitok anang

pag-ayo-ayo ayaw og pasagdi
ang imong kaugalingon

dayon mosimang ko ko ikaw usab
mopadayon sa imong paingnan

dili na ko molingi og balik og ikaw
usab magdali og pagpalayo kay

basin unya og madungog ko pa
ang imong bakho

sa dalang nga gasanga
walay motubo nga pahiyom

bisan wala ako masayod kon unsa

morag taghoy
mora pog awit sa
usa ka
manatad dapit
sa punoan
sa lumboy

nakadungog
ka ba?

dugay ko nang
nadungog kini

apan karon
dili na ako segurado
kon unsa

apan sakto na
nga kini naghatag kanako
og kalipay

ang mga pulong sa gugma

sa silong sa tibook
nga bulan

nagpatunga
kanatong duha

sa atong mga
dughan ang

kahilom
sa atong pagtinutukay

militok og
pulong ang gugma

supak sa gibuhat

wala na akoy masulti
nawala na ang akong gana sa pagsulti
sa angay nakong isulti
nalimtan na nako ang unta akong isulti

og unsang hitaboa nga ang
akong isulti nalimtan man
nakapanaad ko nga dili na lang
mosulti anang angay nga isulti

kay wala na may pulos nianang pagyubit
sa mga pulong
nga angay nga pamation
magpakahilom na lang ako

dili na ako mosulat
dili na ako maghunahuna pa kon unsay
sunod nakong isulat og isulti
kay wala may mamati
og walay mobasa

og busa dinhi na lang ako kutob
wala na akoy sulaton pa
wala na akoy isulti pa
dinhi

salamat sa pagbasa
og salamat sa pagpamati
og dinhi na lamang ako
kutob

hasta la vista. Adios.

mga dili ikatago

ang una mao ang adlaw
nga dayag
nga bisan og nag-ung-ong pa
sa tago-angkan sa
kalibotan
makita na ang kahayag

ang ikaduha mao ang
bulan nga sa kangitngit
sa nawong sa kalibotan
modan-ag diha
sa iyang agtang

ang ikatulo mao ang
mga kamatooran sa
atong kapakyasan
nga sama sa mga aso
sa atong mga dapog
sa gamay kaayong
bangag sa kisame
manglusot gayod.

mga balaan

balaan nga panyo ni Veronica
korona nga tunok ni Jesus
gilansangan nga Krus
balaan nga mga tunob ni Moses
balaan nga gabas ni Jose
tapis ni Maria
bakos ni Juan

manok ni San Pedro
liston sa sandalyas ni Pablo
balaan nga tudlo ni Tomas
og mga sinintabos ni Hudas

balak apostolado

namaspas sa abog ang tiil
sa usa ka balak
nga wala nimo padayona
sa ganghaan sa imong
kasingkasing

kahinumdom pa gihapon ko

kadtong nagkasabot na mi
nga magminyo
sa layong lugar aron walay
masayod
og makapanghilabot

morag ikaw lang ang nakaatik
og nagpakita ka
sa imong pagsupak nga mora
bag wa koy katungod nga
mangasawa

gikan sa cagayan ikaw lang gihapon
ang nasayod nga gikasal na mi didto
sa usa ka baratohon og barot nga
seremonyas
diin ang huwes nga wala makaila kanamo
wala gani mitan-aw sa among
mga mata nga naggilakgilak sa kalipay
nga morag mga aninipot nga
giputlan og sampot

dunay gamay nga kalingawan sa lungsod
og tua mo didto
nahaluna na og kami sa akong bag-ong asawa
nga nabutaan pa sa kalipay sa unod
miduol aron unta mosandurot sa inyong lamesa
apan ikaw kuyog nila kalit lang dayon nga
namahawa nga mora bag
kaming duha dunay sakit nga mananakod

dili ko gayod kadto hikalimtan
kay sagpa kadto sa akong pagkatawo

karon moduol ka aron ako imong ilailahon pag-ayo
maayo akong tawo apan sa dili pa nato sugdan ang tanan
mosagpa gayod una ako kanimo

gusto nako nga mabati nimo ang kasakit nga akong gibati kaniadto
nga morag utang nga nagsigig dako
og dili na gani maihap ang tubo

kay ako kang sultihan ang akong mga kasakit og kaulaw
laki og baye og karon daghan na kaayog mga anak
mga apo og mga apo pa gayod sa tuhod.

paghimo og tanghaga

pagkuha og bulad nga palotpot
og tanod
hukti ang bulad dapit sa ikog
ayaw sa ulo
patas-i ang hikot
then itagkos sa bitayanan
dapit sa inyong dapog
kanang maasohan pag-ayo
sa sugnod nga bil-ongan

pangitaa ang lugar diin
makita sa bintana ang
pag-abot sa bulan
kanang maayong pagkatunong
sa bulad aron makakuha
ka sa iyang anino

itunong ang anino sa bulad
nga palotpot sa imong
plato nga dunay tinunga
na daan nga puso og didto
sa tungatunga
ishot ang anino
nga morag ang gabilangkad
nga puso
maayong pagkadusmo ang
ulo sa palotpot

dayon pagkuha og tinidor
ayaw pagkinamot
ipatong ang imong tuhod
dapit sa dapog

hunahunaa nga kini na ang
imong kataposang panihapon

ang puti nga alibangbang
nga mibatog sa pink nga mga petals
sa bulak nga morag kuko
sa usa ka kapong
sa Sanggotan,

naghatag kanako og talagsaong kalipay

miawit ang akong kasingkasing
kabahin sa usa ka gugma nga putli


ikaw nga akong igsoon nangyam-id
kay ang imong gibantayan mao lamang
ang duha ka itom nga puntik sa mga pako sa alibangbang
og sa kakiat nga bulok
sa maong bulak

ang

mga simbolismo lamang

pulahon ang imong sanina
gipatungan sa imong salapid nga
buhok og milakaw ka nga
gatungkod

walay madungog nga tingog
bisan pa sa kasaba
sa mga bulok
asul, puti, itom

og mga porma

mga syagit sa triangulo
pagpanira sa mga kwadrado
og pagdagan-dagan
og gukod-gukod sa mga lingin

dili na madugay
makita og masimhot
mo na ang
tinood nga nawong
og baho sa hangin

balios

dugay nga pinaabot
apan wala gayod miabot
ang imong
gipangandoy
miabot na siya
apan ikaw
nga iya usab nga gipangandoy
wala na

hitabo sa usa ka bug-at nga hunahuna

sa dihang
milingkod na ang
hunahuna sa
silya sa
pagsulay

tupad sa
lamesa sa
paghandom

tungod sa
kabug-at
nabungkag ang
lingkoranan
og maayong
pagkabundak
ang sampot sa
hunahuna

gisakitan kini
apan wala na
mag-ambat

nabalaka ang
mga babaye
kon basin ang
ulo sa hunahuna
natay-og

tungod sa kabug-at
nabunal ang
agtang sa hunahuna

sila nga wala makasabot
nga naglantaw
sa maong hitabo
durong hugyaw og
pangutana

hinoon
ako nga tagtungod
bisan naulaw gamay

haskang
lipaya

mantsa

puti kaayo nga t-shirt
nahulugan sa uyap
nga akong
ginudnod sa usa ka adlip
sa aslom
kaayo nga manggang
bisaya

pangutana

makapangutana ta usahay
nganong magsulat man kita
bisan sayod kita nga
walay ganahan nga mobasa

nagsulat ko
tungod kay ania pa ang akong kamot
nga sa akong mga tudlo nakigsandurot
tungod kay ania pa ang mga hunahuna
nakidakpanay sud sa akong utok
tungod kay ania pa ang akong mga mata
naglirawliraw sud sa akong kalimutaw
tungod kay ania pa ang computer
sud sa akong lawak
nagsiga nagbudlat
nagpirokpirok

nagsulat ko tungod
kay mao lang kini ang akong mahimo
ang akong mahalad
ang akong kaya nga isukol sa akong
nagtuyok (o mitiurok) nga kalibotan

apan kon mangaputol na kining akong
mga tudlo og madugta na ang akong
mga kamot
og maguba na kining akong computer
o mahalap na ang akong mga mata

moundang na ako og sulat
og kutob sa akong mahimo
balikan ko na lang ang akong naandan

diha na lang unya ako kutob
sa paghunahuna
og paghandom

busog

busog

busog kaayo
og gusto matulog
ang tiyan
mohay-ad sa
D-bed dapit
sa balcony

apan hadlok
ko nga mohagok og
mamatay

ania
nagtindog tindog ko sa kilid
sa pultahan
lantaw sa mga trees
sa rain sa green kaayo nga hills
og bag-ong gitamnan nga
ricefields

kalami ra gyod diri
sa Pilipinas!

hisgot hisgot lang

mangutana unta ka nimo
kabahin anang pag-abot
nato sa puntong
dili na ta ganahan
apan walay kapilian
busa nagpabilin
na lang

mangutana unta ko
samtang anaa ka
pa sa kalinaw sa daplin
sa sapa
sa imong hunahuna

apan sayod ko nga ang imong
mga pulong andam na
imo nang gihan-ay sa mga
kadalanan sa imong
utok og nahadlok ko nga imo
kining mabungat sa akong
atubangan

dili sa ingon nga ako masakitan
o ikaw ba hinoon
kay sayod ka na sa saktong tubag niana

ang ako lang
kay ania kita sud niining lawak nga
ilang gitrangkahan og kitang duha
walay kapilian
walay kapaingnan

sa imong pagpahawa

sa imong pagbiya
gipahalipayan mo ang imong kaugalingon
og imong giyugyog
ang imong walang kamot
sa imong too

walay mitingog sa maong hitabo
bisan ako
gingilngigan sa akong nakita

mora bag
naglolo ka sa among atubangan

pag-ampo sa kasumo

kataw-i ako
gusto ko nga mamati sa
imong katapusan nga
buhakhak

gusto ko na
nga makita sa kataposan
ang imong
hilaw kaayo nga pahiyom

suginlan ko ra ikaw
sa katarungan ngano
nga ikaw akong
gihinagbo
sa matag adlaw

kada oras
nangamuyo ako
sa Diyos
nga unta ihatag na niya
ang gasa sa kasumo
aron ikaw
ako na nga makalimtan
sa dayon

sa kahangtoran

gihigugma ko ikaw
apan dili
kita angay
wala kanato midapig ang
mga katarungan

kon maminyo na gani ka
ayaw gyod og sugot
nga moipon mo sa
imong mother-in-law
kay ang mahitabo
magsigi na dayon kag kinto-kinto
diha sa iyang poder
hangtod nga
mahimo kang bali-dancer.

ang atong mga damgo
atong padak-an
sama kahabog
nianang mga palasyo

kay kon ang tawo
wala na gani damgo
mawala na usab kuno
ang iyang pagkatawo

pasagdi lang
bisan og layo pa kaayo
ang padulngan
ayaw og undang
sa pagsaka diha
sa mga ang-ang
sa kapakyasan
kay sayod ka
nga sa kataposan
maabot mo ra
ang kalamposan

talan-awon sa karaang panumduman

gibiyaan ang puya nga nagsigig uha
tungod sa kauhaw og kagutom

nakalimtan ang gitak-ang nga nilung-ag
alang sa panihapon
napagod ang inun-unan nga palotpot
sa dapogan

ang kolon nagbaga sa sugnod nga walay
pagkapalong
og ang atop nga nipa maayong pagkauga
og undam na alang sa dako kaayo
nga sunog

tungod kay si nanay mibalak diha
sa silong sa bulan
mibuhos kuno ang makusog
kaayo nga ulan
og bisan sa hulga sa usa ka dako
kaayo nga baha
si nanay mibalak lang gihapon
miawit
sa dihang gibiyaan siya ni tatay

mao kana ang sugilon sa akong
lola nga misumpay sa
pag-ingon

nga kadtong puya nga durong iyagak
ako kuno kadto

pagkalunsay sa usa ka gugma

pagkalunsay sa usa ka gugma

adunay puti kaayo nga
alibangbang nga
milupad

og mitugpa kini
sa pungpong sa
puti nga mga rosas
alang sa
usa ka patay

nawala og karon
akong gisulayan og
pangita

akong bugawon aron
motugpa unta kini
sa akong
pula nga kasingkasing

ikaduhang talan-awon

ang lalaki nga nagsakay sa iyang bisikleta
nagdala og tulo ka bundle nga tangkong
alang sa iyang binuhi nga baboy

nga sa kahaponon nagpunay og syagit
nganong ang iyang lawog nadugay

ang lalaki nagkapandol-pandol sa tangkal
aron makakaon ang pinalanggang baboy

nahilom ang baboy nga lingin kaayo og lawas
og ang lalaki nagtantiya na sa iyang timbang

usa na lang ka semana ang iyang pagpailob
og maihaw na kining baboy nga kapritsosa.

usa ka talan-awon

luag ang puti nga polo shirt ang gisul-ob sa usa lalaki
nga niwang nga naglakaw sa baybayon sa kaudtuhon

kusog ang hangin nga iyang gisugat og malakra ang
iyang mga bukog samtang ang iyang kamot naghawid

sa usa ka sungkod nga kawayan. Usa lang ang iyang
padulngan, apan wala siya masayod og kanus-a siya

moabot og asa gayodng dapita ang iyang pahulayan
kapoy na kaayo ang iyang lawas og inihap na niya ang

iyang gininhawa.

reklamo sa usa ka suluguon sa iyang amo

reklamo sa usa ka suluguon sa iyang amo

kon makit-an na gani
niya ako nga maglingkod
sa hagdan
atubang sa naghaguros
nga mga sakyanan
paingon sa bukid
mangasaba siya dayon
nga mas ubos pa ako
sa iyang iro nga
si brownie

ay kanay! sala na ba
ang pagpahulay dinhing
dapita sa lungsod
sa mga asenso?

kahilom

pagkahuman nila og tariki
sa ibabaw sa bermuda
sa ilalom sa dakong
punoan sa bulahan
nga daghan kaayog bunga
nangatulog silang duha
sa tumang kahilom

sama sa mga tunob
sa kanding
diha sa uga kaayo nga balas
dapit na
sa kaadlawon

sa atubangan sa pader sa among balay

nangihi ko.
wala koy t-shirt, akong short khaki
og akong giabrihan ang akong zipper
og gipagawas nako ang akong
fly.

ni-fling og mi wiwis
paingon sa mga
colorful nga mga parpagayo
sa akong wawas

nakalingi ko sa kilid
sa among porch nga dunay
dako kaayong samin
nga naglantaw sa
among garden

sus nakuratan ko sa akong
nakita

pagkadako na gyod diay kaayo sa akong

tiyan.

ang kiat

ang iyang kagwapa
dies porsyento ra
ikumparar sa imoha
apan lupig ka
lang sa kundat
mao nga gibiyaan
ka sa imong bana

gihigugma mo ang kangitngit

og gigakos ka sa iyang mga hilit-hilit nga dapit
gibag-id mo ang imong mga paa sa iyang mga hagdan
og gitandayan ka usab niya sa usa ka pasalig
mihawid ka sa iyang mga rehas
og gialirongan ka sa iyang mga bongbong
ang mga gabii nanganak og mga kaadlawon
tungod kay

gihigugma mo gayod ang kangitngit

sa paghimo og giwang sa kahayag
managlahi ang atong padulngan
ikaw paingon didto og ako paingon ngari
pinaagi niining pag-abli sa usa ka pultahan
sama nianang bisan sa kadyot lang nga panagbulag
basin, pamasin lang, og makita na nato ang kahayag

usa ka hapon niana

gilantaw sa
kahayag ang kangitngit
gianinaw
kon unsa ang anaa niya
nga gihigugma
sa usa ka kaanyag

ang tanan anaa na kaniya
gawas lamang
sa kahilom sa mga bitoon

nakasabot siya

ang akong gugma sama
sa usa ka dagat

wala kay masulat sa iyang
mga balod
wala kay mabutang nga timailhan
nga ikaw ang
tag-iya kanako

ang imong mabati mao lamang
ang paglawig sa akong sulog
nga misuot sa mga ngilit nga dapit
sa imong kasingkasing

unang ritual alang kang inday lilia

unang ritual alang kang inday lilia

miluhod siya nga walay putong
mipiyong sa iyang mga mata
og daghan siyag nakita nga wala pa
sukad sukad niya
damha

daghan siyag nasimhot
og natilaan
sud sa pipila ka gutlo lamang
nga gipadayag kaniya

ang dinalian nga hagwa
sa kapalaran sa usa
ka dili gugma
apan dili usab kasilag
usa ka pagbati
nga gihinayhinayan
niya og sabot
sa pagdili una
niaanang halok

si inday lilia nahinanok na
sa kakapoy
og sa lahi kaayo
nga kalami
sud sa iyang baba

og sa iyang
paghimata diha sa dugay
na nga katulugon

dili na angayan
ang usa ka
pahinumdum

ekis

ekis

milambi ang pula niya
nga ngabil
ang lagom kaniadto
nawala

lahi na ang iyang kiay
lamba sa iyang sampot
dili na kaibgan
gani kahadlokan

mitindog siya sa kilid
sa tindahan ni Pasing
og nagpaabot
sa iyang sunod nga
tukbon

ginganlan man god siya
og halas

pensa, depensa
kawayan nga bangkaw
ang nag-alirong kanamo
niining gamay nga
balay nga gustong
maglain

dako ang katilingban
og kita dinhi
walay nada sa atong
pagtakuban

sama sa usa ka sundang
nga hait
apan nagpunay og tago
sulod sa
iyang sakuban
nga guban

lantaw ko sa unahan
dunay nagdula og volleyball
ang akong iro nga
si samsam mikiwil ang ikog
gustong moambak
paingon sa pikas

mora ko og malipong
sa ilalom sa itom
nakong payong

mga tigmo
nga adunay mga tubag apan
wala ka kasayod
sa akong kiyod

nagpasabod ka man god
busa tan-awa
daghang mga inaan
og sunoy sa atong silong

dili ba nimo kini makita
sa mga giwang sa atong
salog nga kawayan?

bisan nasayod ka
nga mais lang ang ilang
gianangayan kanimo

kanang imong ugdo nga
bulsa sa imong
puno nga pitaka

gipakibalewala nimo kini
ang utog sa imong adlaw
imong gitubayan

hangtod nga ikaw
nagawsan sa tumang
siplit sa kalipay

walay pagbasol nga
makadulot niini

sa imong mga ugat
nabuhi ka
og dili na nimo kini
ikapanugid

og ikapanangpit
kay imo nang gisulsi
ang imong mga ngabil

wala ko malibog
dili ko lang gayod mabuhat
ang ingon

nagpondo ako
sa akong isla
og wala akoy laraw
nga molangoy didto
sa pikas

mao lang kini og
igo na kini kanako

yawyaw

yawyaw

sa akong yawyaw
sa kaadlawon
sa akong paghimata og
sa akong wala na pagbalik
sa isla sa katulugon
nangandoy ang akong
panumduman nga unta
mamati ka sa akong
yawyaw

mga salingsing sa
simag nga panglantaw

wala na ang pasiaw nga
sayaw sa sayawsayaw
pangagho
pangagho
pangagho
ngano ba? ngano ba?
unsa ba? unsa na ba gayod?

wala ako mangandoy sa
pagsabot
nagyawyaw lang ako
nagsalimuang ang akong
mga pangagho
pangagho nga pangag
niining akong kalag

ayaw pangandoy nga imong
masabtan ang mga pulong
dili mo kini matukib
kay sila mga pulong lamang
og ang imong tudlo molagbas
sa ilang mga kilid

dili ba? nga mao kini ang imong
pangandoy?
o pangagho usab sa hangin
nga mingaw
nga hagawhaw
molakaw ako sa ibabaw
sa tubig
nga dulaw

ah, ang sunod mao ang paglansang
diha sa krus nga gansang-gansang

syagit ayaw, diha sa tumang kasakit!

dunay duha ka bungtod sud sa iyang tilaok

dunay duha ka bungtod sud sa iyang tilaok

si william
nagpunay og tulon sa iyang laway

gibati niya ang kahasol sa duha ka
bungtod sud sa iyang tilaok

morag itlog
gibati niya ang usa ka lama
sud sa iyang baba

morag iti
morag langto-langto
morag iyang gidamgo
kaniadto

si william
wala gyod manugulon
sa mansanas nga iyang giingkib
nga karon
nagbara sud sa iyang tilaok

sakit kuno
bation apan lami lang gayod gihapon

iyang gihikap sa iyang mga kumagko
gilok
makatagbaw ang sabaw

ang iyang tiyan nangandoy
kanus-a pa kaha
kini matagak
sa iyang sabakan

bidli
apan lami
gidili
apan gayod ah, pagkalami

dunay duha ka bungtod
dunay usa ka kanyon
sud sa iyang tilaok

og si william
nga dili balaan

nahimong tawong karaan.

3:25 sa kaadlawon

3:25 sa kaadlawon

manira na usab
ang bintana sa
akong kalag

makita ko na ang
katas-on sa akong
pilok

ang akong mga tudlo
nanagan
apan wala na kahibalo
kon asa paingon

hanap na
dili na kaayo maaninaw
ang mga pulong

nanghuy-ab ang baba
nanirado
gitagoan ang mga puti
nga ngipon

doble na ang mga nawong
sa mga pulong
og ang gipangita
mao na lamang
ang usa
ka tuldok

mamahimong
nagkinahanglan ka og dili ingon kanato
aron ka malipay

ang gilak
sa fairy
ang magic
sa wand

dili na kinahanglan ang masusing pagtoon
og ang paghago
ang paghumol sa imong mga tiil
sa usa ka palanggana nga tubig
sa kaadlawon

kay sa usa ka pamilok lamang
sumala sa imong gusto
mahimong tinood ang tanan

apan dili ingon ana
ang dagan sa kinabuhi

pila pa kaha ka bakid nga bugas
ang imong kan-on?

walay sakit

walay sakit

walay sakit
kay kalit

apan wala gyoy
lami

matod pa sa
among pari

ang langaw nga maanyag

ang langaw nga maanyag
nga sidlak og pako
nga taas og tiil
nga pula og mata
milupad og mituntong
sa buko-buko sa kabaw

nanganti sa usa ka panimalos
ugma damlag
sa kamot sa dahon nga
midagmal kaniya

sungsong

sama ako sa usa ka tren
nga misungsong
sa kangitngit diha
sud sa imong duha ka
bus-ok nga tutoy
diha sud sa kainit sa
imong humok kaayo
nga ilong

hike ko

nag-hike ko
gikan sa Loon
paingon sa
Maribujoc

abi nila
haiku.

nag-hike ko
hi! Kuh!

hayyyy! ku-
lang pa ba ang akong
gi-hike?

panglantaw

duha lang ka
panglantaw
ang maghatag
kanato og
kahulugan

ang unang
panglantaw
sa kinabuhi

og ang kataposang
panglantaw
sa kamatayon

ang tunga-tunga
niini mao
ang atong
pagkabuta og
pagkabungol

pagbungkag sa usa ka pundasyon

karon
gipabungkag na nako ang
karaang pundasyon
ning karaang balay
nga ilang gitukod
sa dugay na
nga mga katuigan

nadungog ko ang
kusog nga
pagpukpok sa mga
maso
og nakita ko ang
pagkapulpog
sa gahi na kaayo
nga mga semento

tukuron na ang
hagdan
alang sa ikaduhang
andana

ikaduhang hugna
sa atong panagpuyo
nga malinawon
tubag nato kini
sa ilang
mga pagduda

usa ka hapon niana

usa ka hapon niana
miwatch si candice sa bungtod

nalisang siya sa
panaglayog sa kangitngit
og kahayag

contrasting kaayo
ang view

morag ang mga kahoy
sa background

diin mitago og balik
ang adlaw

morag mga
haligi nga giduslitan

og acetylene torch
og dayon
kalit nga gipalong

after sa winter

after sa winter
( as in six months jud)

nakakita og unang fly
(langaw god)
si alice

nalingaw ang balaonon
nga babaye

og wala niya fat
ya ang first langaw sa

iyang spring.

ikaw nga mobiya kanako

sa imong pag-abri
og pagsirado sa pultahan
dili ako motan-aw
og dili ko kana hilabtan
kay ikaw lang gihapon
ang moabri og mosira niana

kon magnganga kanang pultahana
kay wala nimo maayong pagkasira
dili ko gayod kana
tandugon

kon ugaling masira mo kana pag-ayo
nga dili na gayod maabri
dili ko gayod kana gihapon
tandugon

imo na ang pultahan
diha sa atubangan niining atong balay
nga karaan
kay ako
niining paghawa sa atong nindot kaayo
nga prisohan
andam na nga mogawas sa likod
dapit sa kusina

kay ang akong bag-ong hinigugma
atua dugay ra nga nagpaabot
usab kanako

metaphysika

kon unsa ang akong gisulti
dinhi
dili ka kasabot

og kon imo akong pangutan-on
kabahin niining
akong gisulat og akong
gisulti kanimo

ako kang sultihan nga
ako usab gani
wala makasabot niini

ang akong gipanulat og gipanulti
kon imong sabton
nangita usab kini sa mga tubag
sa ilang mga pangutana

ang ubang pangutana
nangutana usab
kon unsa ang kahulugan sa
ilang mga pangutana

morag kawanangan nga
nangutana kon unsa ba ang
kawanangan

morag baso nga bisan og
napuno na
nangutana pa gihapon kon
unsa og ngano
ang baso

ang akong uwat

ang samad nga bag-o
pa lang naayo og sa
pipila ka adlaw
mopabati nianang
usa ka katol
nga imo na usab nga
gihinayhinayan og
kalot
kay lagi lami
man kaayo ang ikahatag
niini nga kalipay
sa kalit kini modugo
og imo kining
gitilapan

nagbalikbalik ang kalami
sama sa imong
giganahan nga mga sala

pati gani ang dugo
nahimong tam-is na usab

giuwat ka sa imong
uwat

sa wala nay sulod ang akong palad

sa pag-abot sa panahon nga
wala nay sulod ang akong palad
kanang wala na ako'y
mahikap
og makumkom og wala na usab
ako'y ikahatag
sa bisan kinsa kaninyo
usa lang ang buhaton sa
akong rason og
kini mao na lamang ang
pagpanirado sa akong mga
tudlo daw sama sa usa ka bata
nga puya nga
motakilid og itagbo ang
iyang suwang og tuhod
og dayon og
katulog nianang usa
ka lalom nga kahinanok