gikan sa opisina

nahuman na usab ang usa ka adlaw
biyaan ang lawak sa gitrabahoan
magbitbit sa usa ka folder
lakat gawas paingon sa parking space
ablihan ang pultahan sa kotse
sulod, paandar ang makina
og drive balik sa condo
mohunong ang sakyanan,
pagngon ang makina
sirad-an ang pultahan
i-lock og lakat paingon sa
6th floor, abrihan ang pultahan
sulod, ibutang ang folder sa study table
tangtangon ang sapatos og medyas
og hukason ang puti nga long sleeve og ang
necktie ilabay sa sofa
padulong sa kusina og kuha sa usa ka baso nga tubig
inom, pabugnaw sa tutunlan
morag acidic ang imong gibati
ikaw lang usa dinhi
og kapoy kaayo ang imong lawas
mihigda ka sa imong kutson nga katre
gi-switch off ang suga sa kilid sa bongbong
gi-dim ang lampshade
wala pa'y panihapon
bugnaw ang spaghetti sa lamesa
walay sulod ang thermos
wala na nimo tagad mahubo ang imong karsones
gipiyong nimo ang imong mga mata
gipatong ang imong kamot sa imong pus-on
nagtagbo

mora ka og patay
nakatulog na dayon
niining condo nga pagkahilom
mingaw kaayo

ang nagtikaw tikaw mao na lamang
ang haguros sa imong aircon.

alas siete trayntay singko sa kagabhion.

aduna siya'y nabundulan

aduna siya'y nabundulan

aduna'y siya'y nabundulan
sa ilalom
wala niya makita
apan nahiyaw ang tanan
aduna'y misiplit
miagas
mibaha ang kusog nga
sulog sa tubig
nangayo siya'g pakitabang
misaka ang tubig
og ang tanan mihakop
morag nanikop
og haluan

kon ila lang unta akong
giingnan
nasulbad na unta ang tanan
aduna'y usa ka parte
lang ang hikapon
sirad-an
apan sayang lang
kay tungod diha sa kataha
og kaulaw
daghan ang nabaraw

kay sa akong anino lang
ikaw god nahadlok man

sayon lang ang pag-ingon nga ikaw nahigugma

sayon lang ang pag-ingon nga ikaw nahigugma

sayon lang ang pag-ingon nga ikaw
nahigugma
naa sa imong hunahuna ang mga namunga
mga hinog nga bayabas
nga wala'y namupo
mga nagsinaw nga makopa
nga gituhik sa mga tamsi
mga bulak sa ylang-ylang
nga imong gisimhot
gihambin sa imong mga kamot

apan sa dihang nahulog na ang mikapyot
og nabalian sa iyang kamot
og nangayo na nimo og pakitabang
sa iyang pagkapingkaw
kadali mong midalagan
mipauli sa inyo
og dayon og panira sa imong pultahan

lisod gakson ang pingkaw
magduhaduha ka na unya paghalok
nianang pangag
pakigkuyog nianang kiang
pakigpuyo nianang buang.

atubangan sa samin diha sulod sa iyang banyo

atubangan sa samin diha sulod sa iyang banyo

nabantayan niya ang mga buhok
niya nga nangahulog
naghay-ad sa iyang alugnan
matag buntag
midagan ang iyang agtang
paingon sa iyang alumpulo
og ang iyang aping
morag tubig sa sapa nga
mihubas
ang iyang ngipon nangatango
morag mga haligi sa gubaong
balay nga nangahirig
mitan-aw siya sa samin
human maligo sa iyang banyo
gihikap niya ang iyang suwang
gihapyod nga mora og hait nga sundang
milingo-lingo siya
mikagot ang iyang ngipon
giinat ang iyang aping
mitan-aw sa toilet bowl
diin naglutaw ang iyang tubol
gi-flush
mikuha sa iyang tualya nga
iyang gitapis
og migawas sa banyo
gikomplementohan niya ang
iyang kaugalingon sa usa
ka bugnaw kaayo nga
taghoy.

alas nyube na sa buntag
wala siya'y plano nga mosulod sa opisina.

pakiglambigit

pakiglambigit

sa mas suod kaayong pakiglambigit
tangtangon ang tanan nga gibutunisan
ablihan ang mga gisipiran
ang blouse ang bra ang panty
ang t-shirt and karsones ang brief
ipanglabay kini sa kilid sa katre

manglupad nga morag langgam
gikan sa ilang mga salag
ug diha sa salog og mga lingkoranan
sila mibatog

susihon ang wala sugod makita
hikapon, haployon, himashimason
ang kagilok pasuropon
tilawan ang wala pa matilawi
sulayan ang pagtilap sama sa mga hangin
nga nanilap sa mga dahon sa saging
gipangita ang kasingkasing
diha sa bungbong
sa bukog og panit
gidap-ig ang mga dalunggan sa dughan
gipamati ang tingog sa mga tambor
mitapoy ang imong mga tudlo
sama sa pagtapoy nimo sa mga kwerdas sa imong gitara
mitayhop ka sa imong ginhawa
sama sa pagbulhot og pagsuyop mo sa silindron
gusto nimong tan-awon ng iyang kalag
og busa ikaw mipiyong saimong mga mata
gidap-ig nimo ang imong pus-on sa iyang pus-on
hugot kaayo nga gakos
morag sawa nga milikos sa iyang bihag

ang iyang mga kuko iyang gilubong sa unod
sa imong abaga og likod
gibati nimo ang gamay kahapdos
adunay kawras
morag nasamdan ka
apan wala na kini nimo ambata

hapit na! hapit na!

mihawan ang mga panganod
mibuka ang langit og ikaw misulod
sa usa ka pultahan sa himaya
miawit ang tanang mga anghel
og imong nalilian ang matahom nga nawong sa Diyos


ang mga duga sa himaya
mibuhagay sa iyang bat-ang
wala handoma nga ikaw
niining higayona
nabuang...

apan bisan niini
pagkahuman sa hamubong paghinuktok
tutok sa kisami
lantaw sa mga panganod sa aso sa imong sigarilyo
ang imong kasingkasing
mihunghong

gusto nimong usab sugdan
balikon ang kanhiay ang karaan
niining pagkabuang nga walay katagbawan

talan-awon sa pikas kilid

habog ang breakwater
mas taas pa sa duha ka tawo nga atong isumpay
sa taas
atua ang batang walay sanina
nagtugway sa iyang pasol
sa ubos diin
didto ang dagat
og ang iyang gihandom nga isda
nga unta karong adlawa
iyang makuha

sa unahan adunay gamay nga sakayan
dunay nagbugsay og hinay hinay
padulong sa lawod

nawala na ang sakayan
og ang bata mipahawa na

anaa ang labat nga kawayan
nga pangag
daplin sa baybayon
anaa ang lubi nga nahirig
anaa ang dagat nga dakong patag
luspad siya karon
wala ang mga kanaway
wala na'y tawo
linaw, mingaw.

talan-awon

migawas ang babayeng
puti na og buhok gikan sa
ilang balay nga nipa
misunod ang itoy nga puti
og balahibo
mikiwil ang ikog
mibalik ang babaye sa
iyang agi
gikudkod ang itoy
nga ang ikog misamot
og kiwil
mipadulong sila
sa dagat
nagdungan silag
kaligo

bugnaw ang hangin
og ang adlaw
nasalipdan sa baga
nga dahon sa layog
na kaayo nga lubi
sa daplin sa baybayon

bugti

sayon lang ang pagpangayo
og sayon lang usab ang paghatag
sa imong gihangyo

apan naa sa sunod ang lisod

kanang bugti kanang sukli
kanang pag-uli sa gikuha
nga usahay mas labaw
pa's nahatag

usahay
mas maayo pag walay hatagay
wala pay mahay

ang akong uyab
nanawag

gimingaw na kuno siya
anang bula sa sabon

didto sa banyo
nga basa

ang salog
makadakin-as

sunflowers

aron pagsuta kon
tinood gayod ang maong sunflowers
iyang gidool
gisimhot, gihikap
iyang gikusnitkusnit
gilangkat ang mga gihay
pagkahuman
iyang gilabay sa dalan

ang sunflowers
pagkahuman sa tanan
iyang giangkon
nga tinood jud diay
dili plastic

wala na lang gyod niya
hunahunaa nga wala pay
alibangbang
nga nauwat anang mga
plastic nga sunflowers

ang matood lang

ang matood mao kini:

nakita nako
ang kahil
nga alibangbang
mibatog
sa pink nga suntan

mao kana ang matood
og tood

diha sa likod anaa ang
mga lunhaw
nga dahon

wala ko'y
nakita nga ulod

ning atong fantasya

ning atong
fantasya
ikaw ang prinsesa
nga gisalikway
sa hari
ako ang unicorn
nga imong gipili
saksi ang bulan
sa atong giagiaan
mikatawa
ang mga bukid
dayon
nangyam-id

nasuko ang iyang ugangan
nganong ang iyang dalang katigayonan
usa ka bulak lamang

pula ang bulok
nga mora siyag gisunog

salimuang lang

nagpaabot ka
sa bulan
kadtong tibook
dili sinsilyo
nga mga bitoon

nagpaabot ka
sa usa ka
balak
nga akong
isugid sa
kagabhion
sa tunga-tunga
sa kabugnaw
sa panahon

pakyas ka
kay kining akoa
dili balak

salimuang lang
dili pod noon
binuang.

pula nga tughok
itom og puntik

namaak sa bulak
wala moiyagak

ang mga gabon mihapnig
naghimog dakong banig

dinha sa mga aping sa bukid
gugmang napatik wa mapalid

kay ang bulan miabot na
aron mahikatulog na siya

dandelion

ang iyang mga binhi
iyang gikorona
ang hangin ang
motabang
sa pagsabwag kaniya
lima ka tuig
siyang magpaabot
sa bag-ong bulak
sa iyang kinabuhi

type

type

sa gamay lang
nga saghid
sa iyang kamot
diri sa akong
bukton

mikoryente
abot tumoy
sa akong
kiting

sa usa ka siplat lang
misaka ang adlaw
sa akong agtang

mibalod ang akong pilok
nagpasad ang
daghang isda
sa akong kalimutaw

nad anad lang god

nad anad lang god

kanang gugmang
malumping
anad na ko ana

tiltil tiltil lang
sa pag-abot sa
kagabhion

mawala ra man
ang sakit
sa dayon

restraint

restraint

ang akong mga kamot
gusto nang mokamang paingon sa imong paa
apan
dunay miingon nga yuna pa
basin baya
og masagpaan ka,

og busa misulod na lang kini
sa bulsa sa akong karsones
migunit na lang sa
akong eggs

gugmang guba

gugmang guba

gugmang guba
ako ra poy gagubaguba
dili ikasulti
hadlok sa pari

kaganihang hapon
naguba na pod
kining akong
dughan
maayong pagkawingig
ang apapangig sa akong
kasingkasing

akong giayo
atubangan sa samin
wingig lang gyod gihapon
wa koy nahimo
ambot og nganong
ganahan sab ko
aning gugmang guba

morag silot
na jud ni sa akong mga sala
sa mga mamsa.

ang galot

ang galot

duna kuno siya'y classmate
nga haskang brayta sa math
apil na sa ingles
maayo pag
leadership qualities
maayo sab sa arts
nga og siya pa
pagka-well rounded
jud kadtong
klasmeta

ang ngan kuno
mao si rico mendez

og si rico kuno ang ilang
salutatorian

nakapangutana dayon
ko kon kinsay
ilang valedictorian

og dali-dali baya siyang
miingon
nga "ako!"

losyang

migilok na usab ang akong ilok
sa dihang
nakahawid ang akong kamot
sa imong kamot
wala matuyo

ang paglikay wala nay pulos
nagawsan na ko's akong
2...

losyang nga katalaw
dili jud kati

lawlaw nga purol
dili
patas ang putol.

ang kapong sa pier sa dumaguete

ang kapong sa pier sa dumaguete

sa sayong gabii
nanghagad pa siya og mangga

kay wala jud lagi
sa kaadlawon nanghagad
na lang intawon
og kape

sa negros

duha lang ka matang ang tawo didto
pobre lang
og dato

kon pobre ka
haskang pobreha jud ka
kon dato ka
haskang datoa jud kuno ka

wala'y naa sa tungatunga
morag lawas nga walay bukog ang tunga

walay asenso

ang imong nakitang sip-onon kaniadto
hubakon na karon

kadtong mutaon
og kikion

dalikdikon, kaspaon,
ap-apon lang gihapon

walay gayoy kabag-ohan
kining atong silingan

walay gayoy asenso
kining atong katilingban

ang mga kawatan kaniado
tulisan na karon

ang mga pobre
misamot ka pobre

og ang mga dato
misamot ka tuso

ang mga mangingilad
nagsigig pangilad

og ang mga politiko
nahaniti sa pagpanonto

dili

nag-ingon ko nga dili nako gusto
madungog ang syagit
og tuod man misyagit ka
kusog gani pag-ayo
kanang morag mabuak
ang bildo sa akong dunggan
og aron lang unta
nga pauyunan ka
akong gitudloan ang akong
kaugalingon anang mga syagit
gani tanang klase sa syagit
sa matag adlaw
og sa katapusan
nasugdan na nakong nagustuhan
ang mga syagit
og mitug-an ko nimo nga dili
na nako gusto ang kahilom
og tuod man
nagpakahikom ka sa pila
ka semana
hangtod na sa pipila ka bulan

nasabtan ko na ang imong buot
ipasabot kanako
dili ko tantong bulok
aron masabtan nga
ang tanan kanako imong
gisupakan

dili ko bulok
nga dili makasabot sa imong gustong
mahitabo kanato

sayang lang ang akong mga pag-antos
kon mao lang man diay
gihapon ang mahitabo
sa imong mga ginikanan
kaniadto

48 ka tuig akong nahimong
buta, bungol, amang og bakol

walay sapayan
ugma wala na ako'y angayan
nga paaboton pa
ang akong kasingkasing
nakahibalo na anang pagpatig-a

argumento

milutaw ra gayod ang tinood

ang mulutaw mao lamang
ang mga gaan
nga mga tahop

ang mga mongos
nga gikaon sa ulod
mao ang
milutaw sa tubig

milutaw ra gayod ang tinood
ang mongos nga giulod
ang gaan nga tahop

tinood ba ang mga tahop
og ang mongos nga giulod?

milutaw ang mantika
sa dihang gilamog kini sa tubig
asa ba ang
nagkulit sa matuod

ang milutaw og ang
mitiglom?

kamatooran

ang mga bakak
dili ba tahop
napalid sa bulhot
sa hangin
sa pagsulay

kana nagpasabot
nga ang mga bakak
gaan og ang kamatooran
bug-at

higala
wala ka ba bug-ati anang
imong mga kamatooran?

kaya pa ba?

wala ka kaha
napareha sa kabug-at
sa lana
nga imong gikaligo
sa imong lawas
og anaa ang imong
mga balahibo
natuk-an
naglisod og ginhawa

unsaon na lang ba
ang paglupad gawas sa hawla
paingon sa mga panganod
sa kagawasan?

sa mahika og fantasya

sa mahika og fantasya

miabot na ang panahon sa pagkahibalag
ang kabahin sa engkantada nga kaniadto gipaibog ni Nanay
dili tinood
ang kabahin sa mga dwende
og mga lastiko
ang miawit nga mga serena
ang pito ka magsoon nga gitagoon sa usa ka daotan nga hari
ang mga higante sa bungtod
ang mga flora del cielos
mga mugna lamang sa hunahuna

adunay gamit ang fantasia
adunay pulos usab ang mga kamatooran

mipahiyom ako sa engkantada nga mibatong sa akong agtang
og sa sigbin nga mitapad kanako

dili ko sila papaulion
sa ilang mga lubnganan
sila ang mobuhi sa akong mga patay na nga pagtoo
niining dula sa kinabuhi
ang bulok sa mahika og ang fantasia
ibuka ko ang akong mga mata
mopahiyom ako pag-usab
kay ang akong nakita
wala gayod nimo malantaw
ang akong nadungog
wala gayod nimo mabati

ang akong pahiyom nga nagpahipi
sa akong aping
mao kana ang tinugdan sa usa ka kandiis
nga imong gikasinahan

balod

balod

balod sa tubig
ayuyok sa matang sa atong
paghimatngon

sabwag sa atong panabot
paingon sa pagkawala
ang tinood
wala sa ibabaw
anaa baya
sa atong ilalom

ang tinood nga bulak nga maanyag
anaa gayo'y nawong
nga andam
niyang ikaatubang
sa isog
nga kahayag
sa adlaw

tipasi

tipasi

ang tipasi mamahimong duha
ang unod og
ang tahop

sa kakusog
sa imong pagtayhop
tan-awa
wala na hinoo'y
bisag usa
nga nahibilin
sa imong palad

unsa ba ang imong panaw?

unsa ba ang imong panaw?

nahisama lang ba kini sa usa ka bata
nga nagtabyog-tabyog sa iyang kaugalingon diha sa duyan
wala man gani nahago
kay nalipay man kaha
apan wala baya siya'y naabtan

sa pagkahinog na sa mga uhay

sa pagkahinog na sa mga uhay

sa pagkahinog na sa mga uhay
kon wala pa gani ang manganihay
paliron na lang kita sa hangin
balik sa atong gitisokan

manubo na usab kita
tumban na usab nato ang yuta
og magbalik-balik kita
sa samang mga panahon
ang pag-ulan ang pag-init
ang pagtayhop og pagkauga

bation nato ang kapuol
niining pagtubo og pagkalaya
dili kita makagawas nianang
paglibot-libot sa kinabuhi og
kamatayan

anaa ang kakapoy
kay ang manganihay
nakalimot na kanato

siya man god ang maghipos
siya man god lamang ang motapos.

sa mga nanglupad nga mga kanaway didto sa baybay

sa mga nanglupad nga mga kanaway didto sa baybay

nanglupad ang mga kanaway
sa hanap nga kapunawpunawan
mga tunob sa baybayon
milapas sa usa ka utlanan
ang mga kamot mikawaykaway
sa mga nanglupad nga mga kanaway

prinsipyo

prinsipyo

kamong tanan ang dagat
og ako ang dakong bato
nga mibabag sa inyong padulngan
anaa ako sa tungatunga
sa baybayon
kay ako ang utlanan
sa tubig og yuta

sayod ako nga inyo akong lumpagon
og sama sa mga balas
sa ilang kapildihon
inyo akong pagahadlokon

apan balalewala na kana kanako
andam na akong mobalik sa akong mga
abog nga mga ginikanan

gapnod

sa iyang pagpakabuhi
gisulod niya ang baga kaayong gapnod
gipangita niya ang mga hanap
nga gabon

wala siya nagpahayahay diha sa
tungatunga nga dan-ag
hinonoa gisulong niya ang
dili unta angayan nga adtoan

kay sa kangitngit mibuka
ang iyang mga mata
sa gapnod sulod sa tumang kahanap
didto daghan kaayo siyag nakita

sa kamingaw natugkad niya ang
kalalom sa kalipay
sa kasubo sa iyang kasingkasing
nadungog niya ang
labing maanindot nga awit

sa kataposan

sa kataposan

sa kataposan ang kunot nga kamot
mihawid sa
kamot nga guot

walay gibilin ang nanamilit
wala po'y gipadala ang nahibilin

ugma pagaalisdan na ang mga alugnan
og mga habol

kadtong puti, humot, dili gani bag-o
apan bag-ong uga nga nilabhan
kadtong maayo gayod
kaayo nga pagkaplantsa

wala una'y matulog didto
bisan gani ang kahadlok
nagpanuko
bisan gani ang kabalaka
nagduha-duha.

ang akong pangutana

ang akong pangutana

nakalipay ba sa Diyos
ang mga awit ni Haring Solomon?

kita nga nagmatngon
mao na man hinoon ang nahimong nagpakaaron-ingnon?

mao kana ang pagtoo
sa tigulang nga ang iyang imortalidad

anaa sa mga unod sa mga batan-on nga mga babaye
lisod usab diay kon ikaw na ang mahimong hari

ang bidlisiw sa adlaw
sa sayong kabuntagon
nanuot-suot
sa mga haw-ang nga
kangitngit

namugaw na
kay iya na usab ang panahon
mora naalimungawan ko
kay kining
maanad na gani ta sa kagabhion
sa iyang kabugnaw
og kahilom

mao na lang man usab
ang atong pangitaon
mas maanindot na man
hinoon
ang itom kay sa mga dalag
nga dan-ag

mas nindot na man hinoon
ang mga damgo
kaysa tinood.

salamat

salamat

salamat kaayo
sa imong kaayo

mora kag busay
ang imong bugnaw kaayo nga tubig
sa akong mga tig-a og
mga bato midagayday

morag mga buhok sa
maanyag nga babaye
nga mihapohap
sa akong lawas

ang huni sa tubig
ang kabugnaw niini
nakapahumok sa akong
bato nga kasingkasing

pagkaanindot sa
usa ka alibangbang
nga misuyop sa nectar
sa puti nga bulak

kon ako lang ang dahon
o ang sanga
ba hinoon
unsa pod kaha ang akong bation?

si ruben sa iyang pagpangita sa gugma sa usa ka adlaw

si ruben sa iyang pagpangita sa gugma sa usa ka adlaw

nagmalipayon si ruben nga mihay-ad sa dagat
walay sapot
andam na siya sa paghapuhap sa lalaki
nga adlaw
unyang gabii matulog siya sa pagmaymay sa babaye nga bulan
og sa mga bataot nga mga bitoon
ang tiuglang nga hangin nga nasuko nanghulga sa usa ka bagyo
og ang mga dili talagsaong balas nga itomon
nga kagahapon nagsigi og biay-biay kaniya nangahilom
kay ang adlaw mora mag nahigugma.

ang iyang mga totoy
nga nanambo sa iyang dughan
naghisgot og
mga katungod og kagawasan

ngano ba nga sila tabonan man?
law-ay ba ang kinaiyahan?
ang mga paa naglipay na
dugay ra silang
nakighilawas sa tubig
sa balas
sa lapok sa mga lamok
sa mga kamot

ang mga buhok
nanguhit sa abaga
walay malisya.

si arsenio ang maestro sa syudad

katungod niya ang pagpanigarilyo
sa kwartong iyang
binayran

ang lubot mikulob
nangita na usab og tukob

silang duha nangita og gawsanan
sa ilang mga prisohan
silang duha lamang sa ilang
gipili nga lawak
ning gamay kaayong kalibotan
nagtakbo ang ilang mga hawak
wala na didto ang wakwak
ang nabilin mao na lamang
ang kalami
sa ilang mga iyagak

ang tanday sa katulugon

ang tanday sa katulugon

gitandayan siya sa puti kaayo nga paa sa katulugon
gihapuhap sa iyang mga kamot ang bitiis
midampi ang iyang paa
sa iyahang bilahan
ang iyang ngabil mipauraray
sa iyang dughan

nabati sa kagabhion
ang nindot nga awit sa usa ka hinanok

toro-toro

toro-toro

abi nimo og ang toro-toro
namugna sa atong panahon

ha ha ha
sayop ka higala

ang toro-toro maoy unod
na sa usa ka karaang bukog sa
usa ka panahon kaniadto

kinaham kana sa mga iro
nga nakig-gubat sa iyang mga igsoon nga iro
sa pag-ilog sa kalami
sa maong bukog
sa ilang kahakog

si Fanny
nagsugod didto aron siya maila nga tinood nga babaye
mao usab ang nahitabo kang
Alexander Pope
nga usa sa mga ganahan kaayong
molantaw
sa maong kataphaw

ayaw og kabalaka
sa atong panahon, gani dapat makulbaan na kita

kay sa tinood lang, ulahi ra ta sa mga kabuang nila.

ang plawta ni Sappho
ang torotot ni Plato
ang awit ni Sophocles
ang hawid ni Aristophanes

mao kana ang pagsugod
sa pamilisopiya
mao usab kana ang
kataposan sa
pagpamalak

pagsalop

pagsalop

nagkahilis nga adlaw
dalag nga kamatyonon
kahil nga paingon sa pagkapalong
mikanaog na
padulong sa kasagbotan
mobanos na ang kangitngit
nianang pagpiyong
na sa mata sa adlaw

walay kanaas sa halas
walay kibok sa sapa
walay haguros sa hangin

haom sa akong katulugon

dakpanay

dakpanay

sa france
nagdula og dakpanay
ang mga dagkong tawo
sa ilang katilingban

usa ka lalaki
og tulo ka mga babaye

walay mga tabon
ang ilang mga talibon.

pagkayano lang unta sa kinabuhi

pagkayano lang unta sa kinabuhi

mobalik kita sa kinaraan
dili na nato lantugian pa
dili na kinahanglan nga atong himoon nga komplikado ang atong kahimtang
ang atong mga tuyo
yano lang kaayo

ipahaom lang nato ang angay nga isulod
ako ang mosulod sa imong kinabuhi
og imo akong pasudlon sa walay pagdumili

haom na ang tanan
unsa pa bay gubaton niining atong lumalabay nga kalibotan?

kaunugon sa mga nanglabay nga panahon
kon dili nato masabtan kining yano kaayo nga misyon

ipahaom lang nato
unsa ba bay laing tuyo?

ang gamay nga pasalig

sapnayon ang mga balak sa baybayon, ipabanlas ang imong balodnong balak sa Baybayon

nagpakaaron-ingnon akong tulog pa
sa sayong kabuntagon
og ikaw mitutok kanako og mipahiyom

igo na kana kanako.

ang suba sa kinabuhi

ang suba sa kinabuhi

anoron kita sa suba sa atong kinabuhi
sama sa dahon
sama sa kahoy nga nalukat didto gikan sa
dakong bukid
mikuyog lamang kita sa sulog
kinsa ba ang dunay mahimo
kon asa kita ibanlas
niining gamhanang sulog sa kinabuhi

sama sa kakusog sa atong mga pagbati
asa ba kita manghawid?

ahh, gikapoy na ako niining sulog
sa suba sa akong dughan
puslan man
awiton ko na lang usab ang mga huni sa kahanginan
ang yamyam
sa sulog ning suba sa akong kinabuhi

sa walay pagsupak
sa tumang pagtamod sa ilang mga balaod

basin diay puhon og moabot na ang
akong pagkabanlas diha
sa kalipay sa daplin sa baybayon

nindot baya usab ang pagpalutawlutaw lamang
unsa ba gayod ang angay nga kabalak-an?

usa lang ako ka dahon
usa lang ako ka kahoy nga naugkat gikan sa layo nga kabukiran
usa lang ako ka anod sa makusog nga ulan
usa lang ako ka mugna nianang dako kaayong baha sa kinabuhi
ang akong mahimo mao lamang gayod ang pagkuyog
ang pagpaanod

unsa ba gayod ang angay kon kabalak-an?

bag-ong tubo

pagkahamis sa panit
maaninag ang gagmay
kaayong mga ugat
pagkapresko gayod
laming hikapon
laming hagkan

lami kutloon og
lami kan-on

mao kana ikaw
og mao kana ang wala na kanako

ang malinawon nga dagat
gihadlok sa mga nag-atang

nga mga sementong nangabuak
imburnal nga naliki
mga lansang nga tay-an
mga karton nga kum-ot

ang bukid mitutok kanila
ang mga panganod kaiyakon

ang daplin sa baybayon
wala mipahiyom og ang mga kahoy

nagpaabot sa ilang mga lakang,
ang tawo ang nagbutang kanila

dinhi og mao kana ang ilang
gisaligan, miiyak ang mga balas

kay ugma mao na usab ang
pagsugod sa usa ka pag-gun-ob

sa kinaiyahan, ang adlaw nasuko
og ang bulan nagpasug-o og

ang mga bitoon mikiblat-kiblat
daw napuling sa mga abog gikan

sa puthaw, sa mga makalanag
sa makapaso sa makamatay.

ang anghel nga bato

ang anghel nga bato
natulog
dugay na nga panahon kining natulog
mao kini ang imong gipanghambog kanako
kaniadto pa

gipalupad mo ang mga anghel sa ibabaw sa akong
duha ka ayuyok
aron lang unta ako mausab

nawad-an kag paglaom sa akong maayong kaugmaon
kay sa akong mga tunob lamang
nakita mo nga ako
wala gayo'y padulngan

nanugon ka nga unta adunay moagak kanako
sa dihang mipanaw ka
namati lang ako
kay wala ako'y angay nga isulti kanimo

midagan ang mga panahon
ang anghel nga bato nga anaa sa imong kiliran
bato lang gihapon

ako nga imong gikahadlokan nga mahulog sa pangpang
namati lamang
daghan ako og mga agianan padulong didto
apan wala kana nako gisulti kanimo

ikaw, nga walay, pagsalig sa akong mga pako
og mga kuko og mga mata
kaanugon, taas man unta ang panglantaw ko kanimo
mas mitoo ka man
sa anghel mong bato

gihuwesan mo ako, bisan sa wala mo pagdungog kanako.