gibilin mo man
ang imong sapatos
sa akong
hagdanan

gihipos ko kini
andam sa imong
pagbalik

sama kanimo
mas ganahan gihapon
ako
diha sa pagtiniil
sa akong
panaw

sa imong edad
gusto pa ba nimong
magpasingulan

mosayaw motaghoy
unya pagasumsuman
sa mga katawhan?

pagkatugnaw sa
kagabhion
kusog ang ulan
dili magdungog ang
mga bata sa ilang
lawak

dali diri
sulod sa balay
ania ang init nga
sabaw
sa manok nga
nilat-an

dali diri
ania ang tualya
ang uga mong
sinina

ayaw kaulaw
igsoon kita
diha sa gugma

pipila kaha kanato
ang nagpulaw

nakigharong sa
kagabhion

nakigsulti diha
sa mga baba sa
kangitngit

pipila kaha kanato
ang wala makatulog
sa atong kahimtang
karon

nakadungog ka na ba
sa hungihong sa kamingaw?

dugay na kadto

kadtong paghikap mo
sa akong
palad

gipangita ka
sa nahanaw nga dalan

daghan na ang mga
nanglabay kanako tupad
sa pipila ka kagabhion
sa akong higdaanan

dili kalikayan usahay
nga ang kainit sa imong palad
mabati ko pa gihapon
diri sa akong pag-inosara

dugay na man unta
kadto
apan ngano kaha
nga kini
nagpabilin pa man
gihapon?

nostalgia

i

hangin
nga misulod sa imong
lawak
bisan ug sirado na
ang pultahan ug
mga bintana

ii

kandila nga
kanunayng gasiga
bisan pa
man ug imo
na kining gipalong

iii

ang tingog sa lamok
nga nagpabilin sa
imong dalunggan
human mipaak
sa imong aping

iv

pagkadaghan gihapon
sa mga salingsing
sa mga dahon
sa kahoy nga abi mo
patay na
sa dugay kaayong
hulaw....

ang tagolilong nga sa oling misulat ug balak

ginapos man
ugaling
apan makasulat
sa oling

gitangkas ang
tagkos
migawas ang
pahiyom
ug milupad
ang tagolilong

mibalik
gibalikan ang
gapos
ang naandang
makahupay

langgam nga kalayo

siging kulang ang pulong
maong hapdos ang dila dili kalitok sa imong nakita

daghan ang naglibot, minggimok, mikuhit kanimo, gustong makighinabi
apan sa kanunay kulang ang pulong, dili malamposon ang imong pakigsandurot sa dili malitok.

pahulay lang usa, panghagdaw sa mga nangagi, kutloa ang mga tanghaga, butangi ug silaba patuboa.

basin ugma makita mo ang lahi nga pulong nga sibo sa wala sugod mahulipi sa matood nga pagbati.

paabota lang kini. Motubo kini, mobuswak, bisan ug wala ka na. Anaa ang bata, nagnganga, ang iyang
baba mao ang salag puhon sa langgam nga nagkalayo apan dili gayod bisan kanus-a masunog.

pagbalik sa ikaw, kanimo, sa ako

mas nindot
kon ang tanan sama sa kasamok,
kalipay, kalinaw ug uban pa nga lamas
masumbalik gayod diha kanimo sa imong pagkaikaw

ayaw sa mga pahina sa mga libro, sa mga footnotes, headnotes ug uban pa,
balik sa kaagi, balik sa unsa gayod ang nahitabo, balikan mo ang ikaw, kay kana ra gayod ang tinood.