kallisti

 nag-away ang
bungi, ang pangag,
ang kimpang,
ang unano
kon kinsa nila ang
pinakagwapa
sulod sa mental
hospital

paghan-ay

paghan-ay

ang pinakamaayong moborda
mao ang pinakahilomon

pagkaanindot sa iyang mga buwak
nga hinimo sa tanod
nga iyang gimugna diha sa puting
panapton

ang pinakaanindot nga buwak didto
sa panapton 
mao ang gaduhaduha pa sa pagbuswak
madudahon sa pagkamatood sa adlaw

ang pinakaanindot nga panapton kadtong
nabordahan sa buwak nga wa pa kaayo
mibuswak nga nahawiran sa kamot
nga kanunayng natuslokan sa dagom

ang pinamaayong kahilom kadtong
hapit na iborda diha sa puting panapton
nga wala pa giluwa sa tilaok sa tanod
nga gihuktan pa sa dagom

yabag....

yabag....

sa tungang gabii gisulayan ko
pagsulat kining balak

nahikatulog ka na
ang imong nawong malinawon nga
nag-atubang sa kisame diin ang
suga hagbay rang gipalong

ang akong mga pulong morag mga
bagtok nga nagtikawtikaw sa kusina
nga sa kagutom nangita og pagkaon
namasin nga naa pay wala masulod
sa kaldero nga kasagaran imong
dat-ogan sa bairan nga bato
aron bisan sa iring dili masungkab

kabalo ka kon unsa kahugaw ang mga
bagtok nga diha sa kangitngit nahimong
mga hawod, bangis, abtik, og kawatan

ning tungang gabii gisulayan ko pagkawat
ang tanan diri kanako nga sa kanunay
akong gihipos gikan kanimo, nga ako usab
nahisama kanila, hugaw, bangis, hawod,

og walay ilhon nga balaod, bilar, laog,
igpot, og wala nako damha nga ako diay
kini sa panahon sa kangitngit, sa panahon
sa inyong mga katulugon, gani, 
nakuratan man ako, kon nganong 
sa pagsulat niining balaka, kalit lang,
nawala ako, og bisan unsaon ko pag-ila
kon kinsa ako, dili ko naman kini
mahimamat, nga mora bag ako nahimo
usab nga usa ka lamat, latagaw, 
kurimos, kulismaot, yabag, og sa dihang
may nadungog akong tunob, kalit lang
usab akong misulod sa usa ka buho,
nga karon samtang wala ako masayod,
gitawag ko kining akong kaugalingon.

pagpagarbo

pagpagarbo

ang balaod og balak
mao ang sanga og ang salingsing
nga sa bentana misungsong
sa sulog nga kahayag
nga gikan sa kahaponon

argumento de paturatoy

argumento de paturatoy

nagkatagbo  ta sa 
food court
didto's robinson
wa damha

ako ang nakauna
og kita nimo

gamay na man
diay ang imong buhok
nipis na pod ang imong
mga tudlo
morag gikagid na ang
imong liog
misamot og kataas ang
imong suwang
midaot ka diay

aron wala'y mahitabo
mikalit kog
kulitog sa akong
cellphone

bisag walay angay
kuliparon
gikulipad gihapon
anko ang keys
morag miapil kos
konsyerto ni bach

milahos ka ug lima ka
lakang
(ako gyod nga giihap)
dayon nimog lingkod
unya tindog na pod
order og sinugbang talakitok
salad nga lukot
og barbekyung humot
 
sama nako
aron walay mahitabo
maayo man o
daotan
nagpakaaron-ingnon ta
nga dili taga dinhi
unya ang tanang tawo dili nato
kaila
sama nga wala usay nakaila kanato

gansi ka kay wa ka
kadala og cellphone adtong
higayona

milantaw kos mga balod sa dagat
sulod sa akong cellphone
gilantaw mo ang bukid nga midagan
paingon Rai Rai Ken

kining atong mga garbo
mas taas pas Mt. Apo
nga bisag wa pa kita sukad
kaadto
ang katas-on ato nang
nakabisado

suma sa tambag sa akong
amigo
mas maayo nang di ta
magtingganay
aron di na kita bisan kanus-a
pa mag-away

nahisama sa ilang
panggalot nga mas maayo pag
dili na lang magminyo
ang duha ka uyab
aron dili na gayod magbulag
hangtod sa ikabaklag

experimentong utong

experimentong utong

ang tinood nga iro
kadtong dunay amo

ang tinood nga amo
kadtong mipakaon sa 
iro

silang duha puros
tinood
iro nga tawo
og tawo nga iro

walay iro nga
mopaak sa mga kamot
nga nagpakaon kaniya

kon gipaghot ka sa
iro
tungod kana kay dili
ka niya amo

bisan unsang kadugayon
ang among nawala
sa iyang iro
siya masimhotan
og sa paghimamat
sa kanunay ang
ikog niini
mokiwil gayod

walay amigo nga
mokaon sa iyang
amigo

mibanghag ang iro
diha sa kangitngit
sa misulod nga kawatan

kon wala kini banghaga
ang kawatan
nagpuyo lang sa imong
hawanan

balak alang sa mga ngipon nga nangalarag

balak alang sa mga ngipon nga nangalarag

samtang nanutbras ang tiguwang nga
babaye sa iyang pustiso
nagtingkagol ang iyang alingagngag
sa dakong pagbasol:

"unta kon wala kamo mobiya kanako
wala unta kining akong kahaw-ang"

pragmatismo

pragmatismo

walay kanaway

nga molantugi

nganong daghan

kaayong bolinaw

karon sa dagat.

didto sa lugar nga wala na ang sayop og ang sakto

didto sa lugar nga wala na ang sayop og ang sakto

gikasilagan mo
si Hudas
o bisan kinsa
nga usa
ka traydor

gihigugma mo
si Kristo
ang gibudhian
ang gilansang sa
krus
ang giduslak sa
bangkaw
ang gipurongpurongan
sa mga tunok
ang napandol
ang nagpas-an sa
krus
ang mituaw
nga gibiyaan sa iyang
Amahan,

gikasilagan mo
ang sala
higugmaon mo
ang mga
bertud

kapungtan mo ang
demonyo
hangpon mo ang
Dios

iwakli mo ang mga
sayop
gakson mo gayod
ang mga sakto

apan dili ba dunay miingon
nga ugma puhon
magkita ta sa usa ka lugar
diin wala na ang sayop og
ang sakto

diin ang atua lamang mao
kita
og ang kalipay nga dili
kalibotanon

dili pod kaha nga magkita
kita kuyog sa
traydor og sa gitraydoran
nga karon
anaa na sa usa ka
panaghiusa?

ang Dios og ang Yawa
kaha
apil na ba kaha usab
sa pagsugod sa usa ka
salosalo diin ang tanan
magkita pag-usab
magsandurot
unya wala nay ngalan
og nakalimot na sa
tanang binuhatan?

ikaw kadto.

ikaw kadto.

adunay butang nga
dili nimo sugdan

unya bisan unsaon dili
gayod masugdan

adunay lain nga imong
gisugdan apan dili mo
gayod usab mahuman

adunay imong gihuman
bisan wala nimo sugod
sugdi

ikaw kadto.

ang tiglawog sa ting-init

ang tiglawog sa ting-init

sa ting-init
ibutang nako ang paya nga
puno sa tubig kilid sa punoan
sa mahogany

sa kilid sa paya mao ang
mga mumho sa bahaw nga
sobra sa mga iro

mahimong mosunod ang
mga iring
nga walay pinuy-anan

o pagkahuman mahimong
mosunod ang mga langgam
nga walay nag-atiman

ning ting-init
maglingkod ako sa kilid
sa veranda
og dinhing dapita akong
gilantaw ang
gihimo kong kalipay....