nalipong si Tony
apan sa iyang pangidaron
morag 12 ka tuig na sa
amerikang nagharderniro
drayber ug uban pa
sa puti
wala may nahitabo
nga angay sundogon
sa uban
gani karon
wala man gani bisag
usa ka silingan ang
misyagit og tabang
alang kaniya
wala poy anak
sa iyang kiliran
wala poy asawa o
bisan kadtong iyang
nauyab nga
nagtrabaho sa videokihan
diha sa atbang
sa iyang balay

kay unsa ba gayod kaha
kini si Tony?

siya ang miingon sa iyang asawa
kon gusto ka nga maligo ko
pangita na lang og lain

kon gusto ka nga mosimba ko
pangita og lain

mao usab ang iyang giingon sa
iyang mga anak nga duha ka babaye

ang kapalaran mo....

kon asa ka man karon
mao kini ang hagit og
tugon
pangitaa ang imong
kapalaran
apan kon bisan dili mo
kini makita
og unya mawad-an ka og
paglaum
og mao kini ang pinakapait
nga mahitabo
diha sa pag-ila-ila mo sa
imong kaugalingon
sa dihang
mahinumdom ka og pisi
ayaw padala
nianang tintal sa ambak
sa kamatayon
o sa hikot sa
pagkapakyas
moabot ra ang panahon
nga ang imong kapalaran
mao na ang mangita usab
kanimo
tagboon ka niya diha sa
dalan
og iya kang hawiran
og dalhon sa pultahan
nga moabre alang kanimo
og didto sa sud sa balay
mohiklad ang lingkorana
sama sa mga kamot
sa imong amigo
og gakson ka sa iyang bukton
og mohilak siya
sa tumang kalipay
karon nga
ikaw
nahikaplagan na niya
tibook
og wala nabuak
sama sa usa ka
plato nga gilabay
didto sa
menteryo....

si Lorena...

duna siya'y nakita
pagkahuman sa 50 ka tuig
wa siya magdahom
dili niya ikapanugilon
lisod gayod kaayo litokon
wa siya mobiya
giluom niya ang tanan
wala kay madungog
bisan gani usa ka hunghong
nagpadayon siya diha
sa paghigugma
kay ang tanan migamot na
duna siya'y nakaon
og wala na niya masuka
ang iyang gikalipay
mao ang kamatayon
wala siya manamilit
ang iyang gibilin mao
ang parehong pahiyom
nga iyang gihatag
kaniadtong gihatag niya
ang unang pagtugot

tulibagbag

ayaw hisgoti ang
mga tulibagbag

yubiton man god
ang pulong usab nga
tulibagbag

moapil ang imong apapangig
og tulibagbag morag barko nga gubaon
nga mitulilik bisan og walay
balod
og nawala sa mapa diha
sa tubig

mosimang ang atong mga mata
abi nila og
nabuang usab kita
apil nianang nangatulibagbag

hisgotan na lang nato
ang mga panganod, ang pagsubang sa adlaw
ang pagbuswak sa bulak

nakahinumdom ka ba nga ulan kadto didto sa bukid
og haskang tugnawa
unya nagsalo ta sa init kaayong nilung-ag
gikan sa kolon
gibutang sa dahon sa saging
unya ang atong sud-an
mao ang tinap-an?

sa tunga nato ang lampara nga
gipabilohan og noog og gibasa sa gas
unya paspas kaayo tang nangaon
hangtod nabusog
pag-ayo

unya nanghingugmo ka
unya ang imong ilong naitom?

lamog lamog ang kapait sa daghang botelya nga red horse

misamot og kapait ang red horse
beer sa dihang mikuot na ko og tibuok
one thousand
aron ibayad sa ubay ubayng botelya
nga among nainom

nagkalami na man god ang mga estoryang
wala diri og wala didto
kabahin sa kinabuhi sa uban nga dili nga
gani gyod unta hisgotan
mas moluag man god ning atong mga hugot
nga dughan nga gipiit sa kapakyasan
kon mahalhag og mabandiag usab ang
gidangatan sa atong mga gidumtan kaniadto
og kining akong mga amigo
maayo man sab nga moyagyag sa mga
kaalautan sa uban
morag mga bukag ning ilang mga
baba nga nagbula sa kadaghan
sa beer nga
natungab

medyo makalingaw ning kinabuhi nga
magulang dyotay sa bahalbahal
nagpamati lang ko sa mga green jokes
og sa ilang mga kaagi nga naapil na ang
mga igit og tae

ang looran og loodon maoy gansi sa sumsuman
ang mga ander de saya maoy makauli og una
apan kaming mga bag-ong mibalik pagkaulitawo
ania nag-usik usik sa kwarta milunang sa
dakong suba sa alkohol og mga sinugbang
gabaga pa
nag-aso sa kahumot sa mantika sa baboy og
kahalang sa siling pula

pagkapait sa beer apan kon hunahunaon unsa man god
poy lami kon mahimong tam-is
ang red horse?

"dili na nako kaya ang leche flan
motukar akong tonsilitis
ana" maoy ingon ni Bert nga karon
sugod na ang pagkadiabetic

balak sa pag-inosara didto sa Mall of Asia

misulod ko sa mall
og Asia
ako lang usa
milamog sa dakong
lawod
sa katawhan

misulod ko sa McDo
didto miorder ko og dakong
hamburger og
large size nga ice cold Nestea

milingkod ko
dapit sa lugar diin
makita ko ang gawas
kay glass baya ang
wall
kita nako apil ang
dakong dagat
sa unahan
og ang adlaw nga
gahinayhinay og
salop

nagpista ang akong mga
mata sa nanglabay
nagkadaiya
mga seksing mugbo og
sayal
hapit na gani makita ang
kinot sa kaigwad
sa sampot

mga pamilya, amahan gabala
sa anak nga wa pay buot
samtang ang asawa gabaguod
sa mga pinalit alang
sa panimalay

mga estudyante nga
nakauniporme pa
unya gapasipatsipat sa
ilang mga mata
samtang nagpaabot sa
ilang mga gipangtawagan
sa celfon

sa kagutom
gidako nako og pang-it ang
hamburger dayog tulon
sa akong tilaok
wala na gani kaayo usapa
og kay hapit man matuk-an
midali dali sab kog lad-ok
sa ice cold Nestea

dali rang nahurot ang
hamburger og ang large size
nga Nestea

ning mokaon tang
mag-inosara
ambot pero mosamot man
hinoon og kahapdos ang
atong tiyan
aslom sa akong pamati
ang hamburger unya kadtong
gidalidali nakog inom nga
ice cold tea
morag suka na man hinoon nga
gadalag kalayo didto sud
sa akong tiyan
morag gisunog ang akong mga
tinai og busa naguba ang akong
nawong sa tumang
kaaslom nga unta tam-is
man ang tinood nga
kinabuhi

pait sa kasingkasing ang kamingaw
aslom sa tiyan ang pag-inosara

tungod kay sa akong kiliran
wala naman ikaw...

ang saad....

hagbay ra akong
misaad

dili na ako matandog
sa kabugnaw sa sapa
sa kainit sa udto

bation ko lamang ang
paglabay sa hangin
kutob sa akong mahanggab

ang tubig nga akong gikabo
sa akong palad
wa ko gayod sugod
nga gitipigan

akong giingnan ang ulan
hala hulog hangtod nga
ikaw mahurot

mao usab ang akong
gihangyo sa mga luha

ang akong gitugon sa
kapungot

ang akong gipasalig sa
kapakyasan

giingnan ko ang mga abog
nga gibilin sa hangin

ayaw kamo pagpuyo dinhi
wala'y angayan nga
habolan dinhing dapita

ang kalipay gisayran ko
ang hagdan
mao lamang ang hinanaling
pagbiya

kalaay sa mga butang nga wala mosibog

pila pa ba ka adlaw
nga maglutaw ang dahon?

nganong wala man kini mosibog
sa sulog sa urog?

mora mag
nahug lamang kini
sa usa ka
atabay nga hagbay
rang gipatay
sa pagkamang
sa tumang kalaay

dili lamang

ang pagpangahulog sa mga dahon
dili lamang ang pagpangahulog sa dahon

daghan kitag bunga nga mapupo sa mga dahong
nangahulog
mga hinog nga bunga sa mga kahoy nga talagtag
na og dayon
apan ang mga sanga kanunay nga
namyous lang gihapon diha sa
usa ka
paglaum nga ugma damlag mahibalik ra ang korona
sa iyang ulohan

kinsay ba'y makahatag og tinood nga katarungan
nganong mangahulog man gayod ang mga dahon
sa unsang katuyoan?

para kang kinsa ba kini? gitapok ko ang mga dahon
nagpaabot ako sa ilang mga ipanulti

kining mga kapakyasan man god
gusto man og kaninabi
og ang pagkahulog sa mga dahon
sa yuta
pagkabugnaw gayod nga hampol sa mga kabahong
ning dughan

mga sinsilyo

gisulayan nako og punting ang
kaugmaon

gitirador nako ang iyang
kagabhion gisubay aber kon duna bay

maigo kon masabod ba ang akong bala
nga gamayng bato

wala gayod
walay mitingog nga miingon "ayay! naigo ko!
sakit kaayo!"

ang atua sa unahan mao lamang ang kangitngit og
kahilom sa kawanangan

busa kon mangutana ka kon aduna ba ako'y
kaugmaon

"wala, wala na didto!
walay tawo,walay butang, wala ang kaugmaon"
giignan ko na ikaw niini

hagbay ra.

duha ka bastos nga nilalang nagremedyohay sa dalan

duha ka nilalang
naghapyagay sa daplin
sa dalan
paingon sa simbahan
nagtabisay ang
laway sa laki
samtang ang
baye nagpiyongpiyong
sa iyang mata
sa kalami
dayon og ukang nilang
duha
og sa lalom kaayong
pagkalubong
sa iyahang taas kaayong
armas
nakaiyagak ang
laki
gani nagtulo pa
ang iyang
tus sa
yuta

bastos!
mireklamo
ang usa ka manang
nga nagturong
nga
deboto sa
san antonio
og presidente
sa catholic women's
league

dili makasuhan
kay lagi
mga iro man lamang

alang sa nahigugma kanimo...

nagpaabot ang akong anino
sa kilid sa labat sa balay nga karaan

kon sa imong pag-abot ngitngit na
og dili mo ako makita pag-ayo

sulayan nako og sangpit ang imong ngalan
og dili ba sitsitan ka nako

dili na ako makadala og mga bulak alang kanimo
kay ang akong mga kamot mga hunghong na lamang

ipabati ko kanimo ang akong gugma
sa usa ka nawong sa panganod nga dili mo na gayod mailhan

moingon ka ang panganod morag dako og kahiubos
kaiyakon sama sa usa ka dako nga dag-om

apan wala kay makita nga ulan
bation mo lamang ang kabugnaw sa hangin

nga motago diha sa imong dughan
sulod sa imong sapot sulod sa imong panit

gihandom ko lamang kini
wala'y usa ka panid sa akong kinabuhi ang angay mong basahon

bisag dili ka moingon bisag dili ako manudya kanimo
dili mo gayod ako mahimong higugmaon

alang sa nahigugma

sa dihang nahug ka sa pangpang
sa imong pagkadakin-as
tungod sa ulan sa danlog kaayong lapok
daghang mga kamot diha sa imong damgo
sa dihang gipiyong mo ang imong mata
nga makigharong sa tawong gasuot og itom
nga kapa og gahawid sa hait kaayo
nga sanggot
nga maoy pang-abis sa udlot sa
kinabuhi

daghan ang buot mohawid kanimo
apan wala'y nahimo
danlog ka usab sama sa usa ka isda nga
nakaligo sa mantika

sa dihang milagapak na ang imong lawas
sa kabatoan
giyubit ko na lamang ang mga pulong
alang sa mga panganod

mahimong magpasalamat ka
tungod sa pagkakalit sa maong hitabo
kon mobalik ka puhon
suginli ako
kon naa pa ba ang sakit ang kahapdos
sa imong kasingkasing

diha sa pag-inosara
mohawid ang kamot sa usa
ka sungkod

diha sa pagtiniil sa daplin
sa baybayon
nagtusno ang kalag
sa kaasgad

pagkamalinawon
pagkahilomon ba gayod
sa kadako og kalapad
sa dagat

usa ka kabuntagon
sa akong Abril