balibali

sa tinood lang
nagpatong ako og pulong sa pulong
ayaw sabta nga kini
mao na ang akong
balak
sa akong pagpahawa,

ngano bang nagsigi ka man og
pangutana kanako
kon sayop na usab ang imong
mga pangagpas?

karon dili ko na kana tubagon
ang pulong nga akong gipatong sa pulong
ako na kining kuhaon

ang panyo nga itom akong puston
sa dahon
og sud didto ang bato nga puti

tagkoson mo ang panyo
sa usa ka kahilom

unya, mabati mo na ang akong mga tunob
nga nagbali-bali
sama sa usa ka dahon nga
galibog sa kamot sa hangin

unta masabtan nimo nga ang imong mga
nahibaw-an bahin kanako
pulos kana tumotumo sa akong kapalaran

unta ang wala nimo masabti
ilubong mo na lang kuyog sa akong mga bukog
didto sa ilalom sa yuta

kay puhon, ugma damlag, sa pipila ka ulan
patubuon ko ang usa ka tanom nga
mokatay sa kilid sa usa ka haligi nga tugas

sa pipila ka adlaw lamang mamuswak kini
mamulak
pula ang iyang mga gihay
walay tunok ang iyang sanga
ug pati ang iyang mga dahon
humot lang gihapon

alang kini kanimo
nga akong gisalikway