kagabhion

usa ka babaye
nga taas kaayog buhok nga itom
puno sa dayandayan nga mga bitoon

kabuntagon

lalaki nga nahikatulog
wala pukanga sa kapikas
nga puno sa himaya
wala nay kabutangan sa kalipay
diha sa iyang dughan

nanaghoy nga nag-andam
sa ilang pamahaw

walay pagmatngon

usa.duha, tulo, upat, lima ka bagnod
diha sa mainiton nga sulod
wala gani magdugay
migawas
miduko
mitindog
nanira og
dayon og biya
wala gani nagpabilin
og bisan gamay na
lamang nga pulong-pasalamat.

ang akong gipangandoy

akong pangandoy
nga unta magpahilayo una ako
nga unta imong masabtan ang tanan
nga kini sarang ra gayod nga buhaton
sa mga langgam
apil na ang mga isda
gani ang mga hulmigas
nakahibalo og nagbuhat sa ingon

akong pangandoy
nga unta hisabtan mo nga ako usahay
gusto usab nga mag-inusara sa silong sa anino sa mga kahoy
sa tiilan sa dakong bungtod sa lapyahan sa lapad nga baybayon

ako usa nga pangandoy ang bisan gamay na lamang nga kamingaw
naglingkod ako sa usa ka bato nga gialirongan sa mga sagbot og mga sulom
nakighimamat ako sa bulan sa usa ka kagabhion kuyog lamang ang akong anino
nakigtagay ako og bino sa mga bitoon
gihagkan ko ang aping sa hangin
gikakos ko ang lawas sa akong hunahuna.

balak alang sa kabit

kiwa nga tan-awon nga ikaw nga gikaselosan sa akong asawa
anaa mikumpayot gayod pag-ayo sa hawiranan sa lubot niining jeep
nga akong gipadagan

ako ania tupad sa akong asawa nga bisag unsaon
number 1 lang gyod gihapon

usahay akong kalit nga gipakusgan kining akong sakyanan
aron unta ikaw mahulog sa dayon
apan naunsa ba usab kining akong asawa
nga haskang selosa
ako man hinoon ang giayog kawras
bunal og leche leche

samtang naghawid ko
sa manobela

animal, mangabangga man hinoon tang tanan ani da!

noranian

gikalipay mo ang kadaogan ni nora
akong gikasakit baya kana
kay dili ko noranian bay
vilmanian ko sukad pa niadtong gamay pa ko
sukad pa niadtong nauso pa
ang kantang

sad movies make me cry
nga imo pong gikontrahan atong
rain gently falls whenever you say goodbye
og kadtong pearly shells from the oshan,

kahinumdom ka kadtong gitirador ta ka
kay imong gidrowingan ang akong notebook sa nawong ni nora aunor?

wa ko kalimot adto
mibalos sab kog wiris wiris sa imong notebook sa kulongon og taas kaayo nga buhok ni
vilma santos nga gisimhotsimhot ni edgar mortiz

tiaw mo ba...daghan pa unta kog iistorya nimo bay
apan asa ka naman intawon?

nangamaw na man kuno ka sa chicago?
kon magkita mo ni nora aunor diha sa L.A.
ingna miss na siya ni vilma
diri sa Batangas....

ako dia, tigpaypay ni vilma, giigang intawon
sa init kaayong pamulitika..

dili ikaw

dunay bukog
sa akong tutunlan

iring ang akong
gikinahanglan

ang pagpanimaho sa labana sa sayong kabuntagon

sayod ko
nga gikalipay mo
ang pagpangalimyon
sa labana
sud sa atong
lawak

kada buntag
mosayaw ang kalipay
diha sa imong
mga taghoy

sa paghilom

kon wala na'y ibuga
pwes maghilom

kon matagbaw na
sa paghilom

sugdan na usab ang
pagsulti

ang pag-awit
ang pagsyagit

paningkamot nga
ikaw madunggan

apan kon wala
gyoy makadungog

pwes syagit lang
kutob sa imong mahimo

basin diay og
mamati ang mga bitoon

basin diay og
makasabot ang bulan

basin diay og ang
kawanangan gihidlaw

sa imong tingog
sa imong awit

sa imong pagsyagit
basin diay og matandog

ang uniberso
nga dinhing dapita adunay

tawo nga usa lamang
ka gamayng bato

apan hagtik
nakasamad sa tiyan

sa langit
nakatandog sa kamingaw

sa kawanangan
nga dugay rang wala

nay tawo nga dugay rang
wala na kaila kon unsa

ang tawo
kon kinsa siya

kon nganong hangtod
karon

anaa pa gihapon siya
nagtikawtikaw

sa usa ka kalibotan
nga dugay rang

nawala sa pagtagad
sa kinaiyahan

aristotle

walay tawo nga
imong ibutang sa usa ka isla
og imong
biyaan

mamatay ang tawo kon
wala na siya'y
kaestoryahan

sama sa usa ka liso sa mongo
nga imong ibutang

og itago sud sa lata
motubo kini

mangita gayod og
ganghaan aron

makita niya ang adlaw
kay og dili

walay pulos ang tanan
walay pulos ang tanan.

ang gipuy-an og ang pulong

adunay usa ka lugar nga imong balik
balikan
siging balikbalikan
bisag dili na unta angay
nga balikan
imo kining gibalibalikan bisan
og nakahibalo ka nga ang kalami niini
kadyot lamang
og ang iyang pagsulod sa imong utok
paghigda sa katre sa imong
konsensya
usa kini ka tuyum
nga naghatag og taod-taod nga
kasakit

apan bisan pa niini
wala nimo gitagaan og bili ang mga
pagtusok, pagsamad
paghatag og kahapdos

misaad ka nga dili na kini nimo balikan
kausa na lang
apan permanente kang nahimong bakakon
hangtod nga gikapoy ka na
og himo og mga saad
og imo na usab kining gibalikbalikan
hangotd nga nahimo na kining tipik sa imong kinabuhi
pinitik sa imong kasingkasing
hangtod nga kini nahimong ikaw

og dinhi wala na nimo kini gibalikbalikan
gipuy-an na kini
naghiusa na ang imong balay
og ang imong
mga pulong

wala na maghandom og kausbanan ang kinaiyahan

sa pag-abot sa mga bitoon
wala na kini maghandom nga aduna pay mausob sa langit
daklit lang ang kagabhion
og ang panglantaw niini sa kabukiran
nahisama na lamang sa pagbukhad sa usa ka ylang-ylang
nga pag-abot sa kabuntagon
makita na ang pagkalaglag sa ilang kahunot
diha sa tiilan sa hangin

wala na gihandom pa sa adlaw nga mausob
ang kadagatan
kadyot lang kini nga mosud-ong sa mga balod
sa mga dinaganan niini
paingon sa iyang kamatayon didto
sa baybayon

unsa pa ba ang pulos sa kausbanan?
ugma matapos na ang kalibotan
mapapas na ang mga hunahuna
mawagtang na ang mga handurawan
mawala na ang tanan
mobalik na ang kawanangan
ang kahilom sa kinaiyahan

bintana og pultahan

mas nindot kong ang mga bintana
sama kalapad sa dagat
ang mga pultahan sama ka kipot
sa mga liki sa pangpang
aron dali ang paglupad sa mga hunahuna
lisod ang pagpahawa sa mga gitago

kabahin sa nangka

dagko ang mga nangka ni Tasing
kay ingon niya

pagtanom kuno sa liso
gitabanan og usa ka kutsarita

nga asukar, gani gipakapinan
pa og pila ka tulo sa dugos.

nanghumot ang nangka nga hinog
nangalimyon. Gikatkat ni Pasyo

gigakos og ayo, gihagkanhagkan
ginaog og gipahaluna didto

sa ilalom sa iyang katre.
Ang sa ibabaw mao si Tasing.

gugma nga gidili

duha ka anino nagkita
sa daplin sa suba
naghimo sa gidili
sa ilang nanay og
tatay
sa wala gitugot
sa katalingban
sa balaod

ang ilang mga kamot
naghinikapay sa
ilang lawas,
ang ilang mga dughan
nagbangga
sa kalami

nagtapot, naglikos,
mitungtong,
usahay modaplos
modahili, mokiling
hangtod sa
paghunong,

pahulay, ginhawang lalom
ang usa nakatulog
ang usa nanigarilyo
tutok sa mga bitoon
og bulan

wala'y nakakita
kondili ang dakong
suba


wala misupak
nga sa hinay hinay
milabay lang og
miawit

pamalandong sa mga kahoy nga walay dahon

dili masayon ang paglantaw sa mga patay
nga kahoy
dili malalim ang pagbati sa mga sanga
nga nawad-an sa ilang mga
dahon
kanang bugnaw nga palibot
kuyog sa pagkawala sa tanan
nga atong giangkon
suot ang baga nga karsones
og jacket
sapatos nga panit
og tabon sa ulo og mga kamot
lantaw sa suba
nga mikaging
sa tubig nga nahimong puthaw
sa panganod nga morag agipo na lamang
lingkod
manghinoktok
kon mouli ba o
dili.

sa bag-ong pagmata
wala pa'y hilam-os
og panutbras
mikuha siya sa iyang
bolpen og papel
og gisulat niya ang
iyang hunahuna

kini mao ang
matag-adlaw.

salamat

salamat
sa pagtimpla nimo nako og kape
sa kaadlawon

bugnaw kaayo ang hangin
ganahan ko
nga ikaw ania sa akong kiliran

salamat sa kainit
sa imong dughan
salamat sa kalami
sa imong halok

halaran ko ikaw
sa mga bulak sa atong
katuigan
sa mga prutas sa mga
orasan

salamat salamat
gimahal ko ikaw.

alang sa mga gipanglupigan

ang gaba
dili baya magsaba.

dili kini sili
nga mohalang dayon.

ang pagpanimalos
dili kana magagikan

sa atong mga kamot
kon dili sa Kahitas-an

ang mga gipanglupigan
moawit sa kahanginan

mosumbong
ang mamati ang kawanangan

sibo

lami ng sibo
sama sa tanod nga daling
masulod sa mata sa
dagom

sama sa trangka nga lansang mga misibo
sa buho sa nanira nga bintana

apan sayod ang dagat
nga mas giganahan
ang dakong taga nga
misibo sa
baba sa dakong isda

hatod tabi sa usa ka balakera nga nagpahipi isip usa ka website designer

ang tawong naputos sa utang
dili na kuno kamaong
mosulat og balak,

og kon nganong naputos sa utang
nga wala man unta'y anak
og bana nga gibuhi

mihirit sa pagtubag nga siya kuno
nahinaykan diha sa bisyo sa pagpamalit og daghan kaayong mga pulong

moy, balakera jud!

kumkom

wala sugod
nga ang tawong malipayon
samtang miambak kini
paduol sa panganod
nga ang iyang mga kamot
iyang gikumkom
sama sa pagtago sa mata
sa sinina sa likod
sa usa ka butones.

ang kapuyok

nalingla ka sa kapuyok
sa panahon
nga dili mo ra ba usab
maangkon

ang pipila ka minuto
nga kalipay
bugtian kana sa
kalisud nga walay pagkahupay

midul-ot ka
og busa ikaw napiit
mitakilid ka
og busa ikaw nahulog

miyamar ka
og busa ikaw ang napahawa
miigham ka
og busa kana natangtang

nining akong panaw

ayaw og hawid sa akong
kamot
kay kining akong panaw
ako ra kini

mosaka ako sa bukid
subay sa
gamay kaayong dalan

wala ang bangaw didto
wala ang patag sa tumoy
ayaw ako og hulgaa sa
imong mga luha

panahon na aron ikaw
mogunit sa imong kaugalingong
dalunggan
tabonan mo ang imong ilong
og magpatihulog ka
sa imo usab nga panaw

gikan na ako dinha
wala ang isda nga akong gipangita
wala usab diha ang kinabuhi
og ang kamatayon

ayaw og kuyog kanako
kay basin unya og duha na kita
nga mangawala

ang mga maalamon nga imong giampoan

mabati mo ang ilang
kalamtik
sa hunahuna,

abi nimo og maayo
ang kaalam
wala nimo masukod
ang kalalom
sa ilang kamingaw

nagsuroy-suroy diha
sulod sa
saradong prisohan
sa ilang
utok

nakita nimo nga
sila morag
gipangsilotan
nanag-antos
gipanglutos
sa
gubot na kaayong
lambo
sa hunahuna

og ikaw
nakighimamat kanila
usa ka
kanila, mao kana
ikaw
gilamano

balibali

sa tinood lang
nagpatong ako og pulong sa pulong
ayaw sabta nga kini
mao na ang akong
balak
sa akong pagpahawa,

ngano bang nagsigi ka man og
pangutana kanako
kon sayop na usab ang imong
mga pangagpas?

karon dili ko na kana tubagon
ang pulong nga akong gipatong sa pulong
ako na kining kuhaon

ang panyo nga itom akong puston
sa dahon
og sud didto ang bato nga puti

tagkoson mo ang panyo
sa usa ka kahilom

unya, mabati mo na ang akong mga tunob
nga nagbali-bali
sama sa usa ka dahon nga
galibog sa kamot sa hangin

unta masabtan nimo nga ang imong mga
nahibaw-an bahin kanako
pulos kana tumotumo sa akong kapalaran

unta ang wala nimo masabti
ilubong mo na lang kuyog sa akong mga bukog
didto sa ilalom sa yuta

kay puhon, ugma damlag, sa pipila ka ulan
patubuon ko ang usa ka tanom nga
mokatay sa kilid sa usa ka haligi nga tugas

sa pipila ka adlaw lamang mamuswak kini
mamulak
pula ang iyang mga gihay
walay tunok ang iyang sanga
ug pati ang iyang mga dahon
humot lang gihapon

alang kini kanimo
nga akong gisalikway

hapit na ang panahon

hapit na ang panahon
nga ipakita ko na ang akong
pagkalangitnon,

hiposa una ang imong pahiyom
diha sa bakat
nga lalom-lalom
taboni sa mga doldol

ang gusto usa nakong mabati
mao ang imong bakho
sa pagkawili
kanako

bisan god og dili
kini nako tuhuan

sari-sari

sari-sari ko
dili sira-sira

daghan ko uyamot
gikan sa batong
hangtod sa alugbati

gihimo kong syatong
ako miutong

ahos sa gabii
sili sa adlaw

panakot, sebuyas,
tanglad,
pahumot, pahalang
paaslom
sama sa iba
og hinog nga
bayabas

sa imong kinilaw
o paksiw

sari-sari ko
dili sira-sira

sa matag adlaw
naa ko
walay sipyat
imong kutloon
pilpilon
dukdukon
panitan

gisahon, tadtaron
pritohon,
bisag unsa na lang

walay bili
pwedeng balikan
pwedeng dili

apan bisan pa
niining tanan
wala ko
manira sa pultahan
og bintana

pirming abli
misabot nimo

akong gibati

sa karon nga pagkakaron
akong gibati nga mora kog insik
kwakang

mora kog ulang
nga dili tambok og dili pod niwang

usa ka pugong sa buhok
nga baratohon

itaod
kuhaon

akong giihap

kinse na ka kabaw
ang nagsabsab sa basakan
nga bag-o pa lang
nga giani karong
adlawa
sugod na sa ting-ani
mao na ang
pag-abli sa pultahan
sa usa ka
hulaw

napulo ka lalaki ang
migahab sa
kahumayan og unom
ka babaye nga nanagturong
ang nagdala og mga
pagkaon
namahulay sa silong
sa payag sa kilid
sa kasagingan

sayo pa
ang bulan nga tibook
misablay sa korona
sa kahoy
nga mahogany

adunay usa ka langgam
nga itomon
milupad palayo kanako

ting-ani

ting-ani

gisunog nila ang tanan nga uhot nga nabilin paghuman nilang giok,
palid, sukod, salod, og hipos sa sako sa tanang mga gihay sa humay.

ang aso, nga naghuot sa akong dughan, ang kalayo nga nagdilaab
sa daplin sa mga basakan, ang mga anino sa mga nagdaob niining kagabhion,

nagsulti kanako nga karon ting-ani na usab, daghan na usab ang magsamparay
sa kahubog, magsyagit sa kalipay sa tagay sa tuba og tanduay, mag-ilog sa sumsuman,

daghan na usab ang paa nga matandayan, baba nga magbula, buhok nga makalkag,
mga hunghong sa mga pasalig, daghan na usab ang maburos sa mga saad,

og ako nga naglikay niining tanan, gisapat, mipasibat sa akong sakyanan, pakusog
sa dalan nga napuno sa aso, pagawas, nagdali, magpahilayo aron makaginhawa

sa presko nga hangin didto sa unahan, kilid sa utlanan
sa pangandoy og katumanan.

ang pagawas

ang pagawas

gusto nako nga ang pagawas
sama sa usa ka
pultahan nga hinayhinay
nga nagpasulod og kahayag
padulong sa katre
nga kawayan,

dili dayon katunga,
kon mahimo
gamay lang kaayo nga
lat-ang
sama sa pagtangtang
nimo sa imong
sanina.

pagtoo

pagtoo

kon mitoo ka
kanako
palihog ayaw ko
dalhi og
lamparilya
aron lang unta nimo
makita ang
kasinaw sa akong
ilong

dili ba gihikap
mo naman kini
sa dihang
gigasahan ko ikaw
sa usa ka
halok?

ayaw palihog
pagdala og posporo
og kandila

kay kon imo kining
buhaton
mamatay ang
akong gugma

ang gihatag nga kaalam

ang gihatag nga kaalam

kagabii gipangayo ko na lang
gayod ang kaalam

wa na ko kaantos
di na nako maantos ang mga
hunghong sa ngiwngiw
sa akong dunggan
ang agik-ik sa
kikik sa kilid sa
among bintana
ang hagok sa iwon
didtos sud sa
taro nga puno
og pasaw
ang kibkib nga tingog
sa tabili
sa ang-ang sa lubi
ang hishis sa halas
sa ilalom sa balay
nga gisalogan og
kawayan

karong buntag mimata
ko nanamin
og kita nako ang
akong mga mata
nga milalom
ang akong liog
nga daghan labhag
sa imong buhok
ang akong likod
nga daghang kawras
sa imong mga kuko

dunay laway ang akong
pus-on
nauga

gipangayo ko na ang kaalam
og biyaan ko na kining tanan
ayaw og iyak

karong buntag maglakaw
kong mag-inusara
padulong sa baga
kaayo nga kakahoyan
magpasilong ko
sa kabugnaw
sa akong utok

gakson nakog hugot
ang mga bukton
sa kalinaw

pagputol nimo sa ikog sa tiki

pagputol nimo sa ikog sa tiki

sa dihang giputol na nimo ang ikog sa
tiki nga dugay na kaayong nagsuroysuroy diha sa imong kisame
sa dihang nagpatubo kini siya sa iyang bag-ong ikog

wala ka ba kamatikod nga ang iyang bag-ong ikog
dunay mga mata nga nagtan-aw kanimo og naghandom
kon imo ba nga gihandom ang
kanhiay niyang ikog nga imong giputol
nga wala nimo usiki bisan usa na lamang ka pulong
nianang pagbasol?

wala ka ba ingna niya nga bisan og dugay na nga nawala ang daan nga ikog
ang bag-ong ikog
naghisgot gihapon sa sugilanon nga dili malimtan
sa tumoy sa dila sa bag-ong ikog?

aron ka makasabot niini, putla pag-usab ang ikog sa tiki nga dugay rang nagsuroy-suroy
diha sa nagusbat mong kisame