Friday, July 22, 2011

kabahin niadtong puting kabayo nga kamaong mosayaw

Sa kaadlawon
gidalhan ko nilag kabayong puti

wa ako makaila kanila og dili na kinahanglan
pa nga isulti ko kon
pila sila ka buok og dis-a sila gikan

mikalit lang ug butho sa akong nataran
nga walay tingog-tingog
sama sa usa ka damgo
sa kaadlawon

giablihan ko ang pultahan
mga mga bintana abre nang daan
og nanglingkod sila og akong gitunulan sa
usa ka tasa nga
puno sa init nga kape

gipasayaw nila ang kabayong puti
og misayaw kini

bakakon ako kon
mosulti ako nga wala ako makaangay niini
bisan pa og ang akong balay
dili gayod unta angayan
nga pasudlan sa mga tawong wa nako kaayo maila
labi na
kon pasayawan pa kini sa usa ka puting kabayo

wala pa makahugaw ang kabayo
sa akong salog

diha sa kahilom nakapangutana ako
unsa ba ang ilang tuyo kanako
giunsa ba nila pagkahibalo nga dugay ra usab akong
naghandom ug usa ka puting kabayo nga
makamaong mosayaw
sa tugtog sa kahilom sa
kaadlawon?

unsa ba ang ilang gustong mahitabo
sa akong kinabuhi?
kuhaon ba nila ang akong karaang bangko
nga gilingkoran pa kaniadto
sa akong apohan
nga katsila?

apilon ba nila og kuha ang akong balay?
nakahunahuna ko

basin ang akong kalag?

ayaw ako pangutan-a kon giunsa ko
pagtubag kining mga pangutanaha
og unsa gayod ang tinood
nga nahitabo
pagkahuman misayaw ang maong
puti nga kabayo

ania ako
nagpabilin sa akong balay
gisirad-an na nako ang pultahan
apan ang mga bintana
sama sa naandan
abre na nga
daan

gamingaw ako
apan nagpabilin nga malinawon

alang sa anak ni Sir E.

nahinumduman ko na kining
bataa
anak ni Sir Ernie kadtong maestro nako
sa elementary pa ko

kadtong nagpakuha namog gagmayng bato
og isulod sa botelya sa kulafu
aron lang tubagon kon pila ba ka bato ang
masulod niini

dako na siya
abogado na
og karon ania sa akong atubangan
naghinayhinay na og
hubad sa mga bakak
nga milikos niining dakong haligi
sa korte
nga gamhanan

ambongan nga abogado
nga muatabang na usab sa daghan kaayong mga saad
sa kinabuhi
gikihatan niya ang
kwarta
diha sa lamisa

sa pipila lang kaadlaw
magsugod na usab ug hulma ang mga kunot sa iyang agtang

mabalian siya sa iyang gusok
og bisan og sakit kaayo ang piang og samad
sayod ko
nga sama kanako kaniadto
dili gayod kini
moiyagak
ipakita niya nga siya
ang isog nga anak
ni Adan

tan-awon ko na usab
kon unsaon niya pagbinbin
ang mga kabug-aton sa
pag-antos sa mga
lingla

nausob sab ko
di na ko kapasalig nga ako
kamaong
moagak

sa bisan kinsa nga
mahiagum unya sa
kapait sa mga kapildihon
apil na diha
ang mga ilad
sa kadaugan

Wednesday, July 6, 2011

alang sa amiga nako nga nag-ingon nga mibalak lang siya tungod kay ang iyang kasingkasing puno na kaayo sa grasya og kalipay....

KINING pagpamalak
gratis et amore
in short
libre, walay bayad

sahay
feeling exploited tang
duha

apan ambot
nganong daghang
mibalak

seguro gaguot lang gayod
ang dughan
og gustong mohirit
sa gibating morag barkong
kalunuron
morag kadtong tawong di kamaong
molangoy
unya wa kakuha og
salbabida

nga napuno sa kalisang
wa kalihok dayong mikalit og dagan
nga dili sure
og asa paingon

di pod moambak sa lawod
kay haskang hadloka sa dagko kaayong balod
unya daghang iho nga dagko kaayog baba
og ngipon
nga durong tukob
sa mga pasaherong
kalit lang
nahilom

weird
really weird

apan that is the truth of this
whole story

kasagaran
nagsalimuang

ayaw dayog kasuko
wa pa ko mahuman
wa ko mag-ingon nga tanan
pareho lang

ibutang ka
lahi ka
ikaw si mariang napuno ang kasingkasing sa kalipay
kay diay
buros sa anak sa Ginoo
(santisima santimaan)

ug busa mibalak ka
sama sa usa ka tamsi nga miawit
pagkahuman mahipos sa salag
ang ulod nga
iyang nasaknit
gikan sa kwaknit

ok
ikaw ang ok pa sa olrayt
glad to hear that

mambabalak nga malipayon
napuno sa grasya
nabuhong sa himaya
nanabi nga
sa iyang kasingkasing
wala nay
kabutangan pa
sa kalipay nga
haskang daghana...


actually i am waiting
sultihi daw ko sa tinood bi?

SAYANG....

nagbasol ko

gipalit ko na lang kaha kadtong uwak
nga iyang gihiktan

(mahal ra
ang usa ka libo)

ug unya unsa kaha kadako ang akong
kalipay

sa dihang akong gihandom nga kini
akong gitagaan og
kagawasan?

SAMA SA ISDA SA LANGGAM

walay nagtudlo sa mga langgam
unsaon paglupad
sama sa mga isda sa dagat
wala usay nagtudlo kanila kon unsaon paglangoy

kon miawit ang langgam
kana tungod kay anaa na daan sa iyang sungo
ang maong awit

kon ako nahigugma pag-usab
og mahigugma sa makadaghan
walay nagtudlo kanako
(gani gisupakan ko man kini
apan)
sama sa langgam og sa isda
mahimo ko bang
babagan ang paglupad
ang paglangoy?

Tuesday, July 5, 2011

emen

kahigon nato kining mga
gauga natong mga pagbati
paingon didto sa daplin sa
mga sapa sa
atong mga kalimutaw
aron unta kini
dan-agan sa luha og
dayon mabasa
nga bisan og asgad
ato lang gihapong hangpon
sama sa atong mahinumduman
nga mga
ginagmay natong kadaugan
kaniadto
sa mga gunggong pa kita
nga nagpakaisog tungod
sa gahom
sa mga pag-ulog-ulog
kanato
sa mga haploy sa kamot
sa mga orasan
nga gipangtay-an

sa kaniya nga karon gawasnon....

kadtong mga walay
amo,
kadtong walay gipakadios

gawasnon kadto
ibutang ta dili kaayo malipayon
apan
pagkahayahay sa pamati
nga wala nay
naglantaw kanila kon ang ilang
sunod nga lakang
sayop ba o
sakto

sayop ka sa imong pagtoo
nga siya wala nay pagtoo
og gituohan

mitoo siya sa kagawasan
nagtoo siya sa kalipay

og karon nga hangin na siya
milupad siya nga walay mga pako
gisubay niya ang tibook kalibotan
nga walay sakayan o
katig o timon

mikuyog siya sa dagat
gihimamat niya ang kahaw-ang
sa dakong kawanangan
og diha
nakita na niya ang tanan

wala didto ang kapakyasan
wala didto ang pagbasol....

balak na inday

ayaw patas-a
kay sakit sa mata

ayaw inata nga morag
lastikong tago
kay basin og
moligti kini og
sa dayon
maputol

kanang mubo lang
sama sa
reserved kaayo nga
pahiyom

kanang bisan kadyot
apan haskang
tam-isa
unya pagkakyut

kanang igwad
nga inig tan-aw nako
mamula ang
akong
aping....

balak alang sa karapata ni pretty

pagkadakong burot nimo
gasinaw
nawa ang liog
og ang imong lawas nahimong
usa na lamang
ka dakong tiyan

nalisang ko sa dugo nga
imong gisuyop ni
pretty
(kining akong poodle
nga siging gapadap-ig
sa akong tiilan)

wa ko kaantos
ako kang gibitad og
gipidyat sa akong
sapatos
ning usa ka paagi
sa pagpanimalos

na tan-awa
mibanaw ang dugo
sa salog

pagkahugaw
sama sa usa ka panimalos
nga mimantsa
sa akong
puti nga salog

napuno ko sa kahaw-ang

sa pagtan-aw nako ining
yahong nga wala nay
sulod

ang akong mahinumdoman
mao ang nag-inom
sa sud niini
kaganiha pa lang

nakalakaw na siya
nagpabilin kanako sa usa ka
tam-is
(kabalo ka na) nga pahiyom

kay karon
kaming duha kutob na lang man
sa pahiyom

ako nga nahabilin
morag yahong nga wala nay
sulod

puno ko sa
kahaw-ang


misswah


sa pagkakita nako nimo
wa ko katingog

kaganiha lang
daghan unta kaayo ako og isulti kanimo
bisag unsa lang: ang manok nga nangitlog sa atop
ang iro nga nakakaon og bukog unya
naay dugo ang iyang tae
ang namatay nga bawing sa daplin sa kasilyas
kay wa nay init
nahanungan sa karaang balimbing

ambot naunsa na man ni oi
naamang man ko
apan shalan sultihan ta ka
wa pa jud ko mabuta

saon na lang
misamot ka man kagwapa
unya ning sitwasyona
wa juy nakatabang nako
samtang nauk-ok ang akong dila
og ang akong
mata mibudlot nga morag
lubot sa himongaan nga
sa iyang itlog
napus-an

ayaw kog tan-awa
nabasa ang akong pantalon

Monday, July 4, 2011

Balak alang sa lumalabay

ang mga bato
sa imong hardin
nanag-ilis sa ilang
gipuy-an

makamao na kaha sila
unsaon pagpanaw?

Bisan ang mga balas
nahisama sa mga langgam
nakat-on paglupad

silang nga mga pak-an
sa atong hunahuna
Wa na nato panumbalinga.

Nagpahayag ang lumalabay,
daklit ang panghitabo
niadtong dili makita sa lamat
sa orasan

asa na ako karon?
gisubli ko kini pagpangutana
sa bulan nga dugay
nang mibalik ug suksok
sa ilok sa kaadlawon

Saturday, July 2, 2011

Mal du siècle

nagpunay na lamang akog
ihap kon pila na lang ka adlaw

napuros x ang matag numero
dose ka gabii

dawata nga ang mga mahitabo
wala na kitay labot niini

Weltschmerz

kon masukod mo
sa imong mga bukton ang akong
kasakit

mas maayo

matantiya mo dayon
kon asa gayod
kutob ang
tanan kanako

didto, didto
didto pa gayod
sa layong
bungtod