ang lomboy

ganahan ko sa lomboy
itom ang iyang pamanit
diha kaniya
gilamog ang kapait
katam-is og kaaslom
usahay

gitulon ko ang lomboy
sama sa akong
dako kaayo nga garbo

nabusog ako sa lomboy
nawala ako sa akong kaugalingon
nahupay ang akong kauhaw

gipangit ako nila
apan dili na nila ako makaplagan pa.

ang nahitabo

matag adlaw imong gikitkit
ang akong unod
ang nahibilin na lamang mao
ang akong bukog
og imong gikiskisan ang matag
bukog kanako
hangtod nga nahimo akong abog
sa imong tiilan
og imo akong gipangita
bisan asa na lamang
kay ako nahimong tipik
sa hangin
og nagbakho ka
sa pipila ka gabii nga ikaw
nag-inosara na lamang
kay matod mo
ako diay kuno ang imong
gihigugma

ako ang bugnaw nga hangin
nga migakos kanimo
og nabati mo kini apan
dili na gugma
kon dili ang kahadlok
dili na man gani seguro ang
kahingawa
basin og kalisang na lamang

sultihi ako pag-otro kon
unsa ba gayod ang imong gibuhat
kanako?

dili na ako ang gugma
basin og ako nahimo na nga usa
ka tipik sa
kasilag

ang sebo

ang akong gugma
nahisama sa usa ka sebo
sa tambok kaayong
baka
nga giihaw niadtong
pista

imong gidaddaban sa
kainit sa imong
kalayo ang
akong dughan
og ang akong sampot
og ang akong
mga gusok

init ka kaayo
og ako nga usa ka sebo
nahilis na
pag-ayo

bitaw no?

unsa kaha bitaw no
ang mahitabo kon si Icarus
milupad lang unta
sa kagabhion

og kon mipatoo lang unta
siya sa iyang
tatay:?

ah, kabalo na ko sa tubag
maluwas si Icarus
nalanding sa usa ka isla
nakailaila og dalaga
naminyo
nanganak
nangapo

ah, walay lami
kay wala'y trahedya....

ang iyang kataposan nga balak

nasabtan ko
ang iyang kataposang
panamilit
apan adunay pulong didto
nga dili ko mahubad
dili ko masaysay
kanimo
og dili nato mahisgotan
sayod ko
nga ikaw mismo
nakasabot niini


didto sa iyang lubnganan
gilabay ta ang
buwak og ang bato

og atong pamalandongan
ang katapusang yuta
nga gitabon
sa iyang lungon
og lawas.

didto sa lubong ni papa

midagkot ko og
kandila nga balig
biente pesos.

bisag kalibo pa
kaadlaw kong dagkot
di gyod ko
kabayad sa iyang
gibilin

og sama nga siya
sab
di kabayad sa
kabilin ni
lolo.

maskara

ang uban nagmaskara
aron ipakita ang nindot

kay ang katahom og
kanindot mao man ang ilang higugmaon

nasayod ka ba nga ang uban
nagsul-ob og maskara nga maot

aron lang nila masuta usab kon
ikaw dili ba usa ka bakak?

better option

lisod momata
sa usa ka kabuntagon
unya tupad nimo
siya
unya nauna siya
og mata
kay gitapulan ka na
unya mi-kiss siya nimo
og dayog
hunghong og
i love you
unya ikaw morag
nakuratan
gusto nimong tubagon
og "unsa to?"
apan gikapoy na ka
sa pagpamati sa imong
drama
mas maayo pag
i-bury nimo imong
ulo sa pillow
kay sa moingon
pranka

anymore..i don't love you.

(ginabali aron dili
kaayo obvious?)

bisan tuod og di na ka masakitan
apan mawad-an na man
kas maayong pamatasan

better, silent na lang
bahala na kon dili na halang

damgo sa usa ka taga dabaw

usahay
ginadamgo nako
nga unta kitang tanan
maghiusa na dinhi
sa isla sa
mindanao

moslem og kristiano
bisaya og bagobo
barakuda og ilaga

mangidnapay og
ang gikidnap
sundalo og rebelde

apan lisod, lisod gayod
wala'y bisan usa ani
nga matinood,

mao, sakto ka
ginadamgo lang gani
kay wala
man ginatuman
ning pad tang
sa balod ginkusokuso
man

ang duha ka buaya sud sa atong dughan

nindot ang
buayang atong gibuhi sud
sa lawak
sa atong dughan

gusto natong makit-an
sa uban
busa nagparty ta
imbitado ang tanang
silingan

para makita lang nila
ang nindot
tang duha ka buaya

og tuod man
nakita nila ang buaya sa atong
dughan

kon nakabantay ka
wala biya'y bisag usa nila
nga nasina

unsay akong gibati?

sa dihang mihukom
kang magpalayo una
ngitag space

dugay kong kaatik
nga ako na lang diay
usa ang gatikaw-tikaw
sa sala

miadto ko's atong
marital bed
perhaps sa akong kakapoy
nakamata ko
alas 9 na sa buntag

kon naa pa ka sa akong kilid
sure kong
madungog nimo ang akong
hagok

og masuko seguro ka
nganong maayo nakong
pagkahinanok

pagpamalak

nagkadugay nagkalami
nagkahinam ang kinabuhi
nagkasipot ang akong mga
kibot og kipot
nawa ang kahikurat og
kahiulpot

ning akong pagpamalak
nga imong nasaypan
nga

pagpamakak!

hunahunaa usa
nga usahay ang mga kamatooran
kamao sab nga mangarte

dili sab ni sila palupig sa mga bakak
nga ang mga aryos og singsing
mga tingga ting!

kon walay mantsa ang mga koi

lantawa pag-ayo ang mga koi
nga nakalipay kanimo

susiha pag-ayo
mantsado baya sa lain-laing mga bulok
ang ilang mga himbis

himbisi pag-ayo og sultihi ko
kon ako dili mo na ba gayod mapasaylo

tawga lang nig drama 202

kon imo akong handomon
gusto nako nga ako ang lalaki nga nagbasabasa sa ulan
dili tungod kay ako
giinitan sa akong panahon og gusto nako nga ako mabasa
og mahumol sa kabugnaw nga ihatag
sa gahom sa tubig

ayaw kabalaka
dinhi sa tungatunga sa pagkahulog sa dagkong mga lusok sa tubig
dili lagi nila makita ang
akong mga luha

pag-ila-ila

ikaw diay
ang anak sa akong hinigugma kaniadto
nga miingon nga ako usa ka dakong bakak sa iyang kinabuhi?

mas matahom ka kaysa kaniya
mas humot ka kaysa kaniya kaniadto
mas sanag ang imong pahiyom sama sa usa ka bag-ong mibukhad nga sampaguita
sa ubos sa akong bintana diin ako kanunay nga nanambo

nagpaabot

kon lantawon ko ikaw
daghan akog mahinumduman sa katam-is sa kinabuhi
bisan og layo ka kaayo kanako
ning akong pagsalop
mabati ko gihapon ang kainit sa palad sa dughan sa halok sa mga ngabil
bisan og dugay na kadto sama sa mga gilumutan na nga mga panahon nga nanglabay

ania ako
nagpuyo sa akong gipili nga kalibotan sulod sa akong kaugalingong gibuhat nga balay

wala akoy gibasolan
og sa akong hunahuna dili baya usab sala ang paghandom sa kagahapon

sa paghangop sa mga bato nga akong gilabay sa dagat
sa pag-ihap balik sa mga alibangbang nga nabalian sa ilang mga pako og nangamatay

sa hilom nga pagkawala sa mga langgam nga nanglupad diha sa sulog sa hangin sa kawanangan
wala ako'y sala sa gugma

ang panahon ang tinood nga hinungdan
og ang mga bitoon nga wala modapig kanamo

ang bulan usab nga nagpakahilom lamang
samtang gitaban kini sa kaadlawon

ang sulti sa bata

dili ko anak sa tinapa
labi na nga dili ko peste og yawa
dili ako anak sa liki sa kawayan

bata lang ko
nga mangutana: kinsa ka ba nga
mokurit kanako?unsay imong gahom nga ako
imong kasab-an ?

samtang nanghakog ako
sa pamahaw nga angay
kanako

kinsa ka ba nga moboyboy
kanako?
wala ako nangandoy nga
moabot sa imong balay

wala ako mangayo og ginikanan
kamo ang nangayo kanako
kamo ang nagdala kanako dinhi
samtang ako nag-lutaw lutaw
sa kabulakan sa
akong kawanangan

kamo ang hinungdan kanako
ang nagmugna kanako:

kamo sa inyong kahalab sa pagkitkit sa
unod og paghigop sa sabaw kamo nga
nagtinilaay
dila sa dila diha sa inyong mga
kaulag
nga walay pagkahupay

samtang ikaw mibilangkad
samtang siya misalom sa imong
bilahan og mitiurok
diha sa imong dughan.

kaisog

wala ako'y isulti
sa imong likod

kon moatubang ka
kanako
iyagyag ko ang tanan

tan-awa ang akong
mga mata

kon ang tanan tinood
kon ako angayan pa ba

ang halad

ang kahayag
nanilip sa kangitngit

ang saya sa kangitngit
iyang giisa

wala niya makita ang
gisipitan sa paa

ang kahayag midulog
sa kangitngit og

busa natawo ang
kaadlawon sa sabakan

sa usa ka adlaw
nga halad sa kagabhion

Pagkaanindot gayod
sa bag-ong adlaw
pagkaanindot gayod
sa iyang pag-abot
nga akong gihangop
gigakos

apan pagkawalay
puangod
milakaw kini
nga wa man gani
nananghid kanako

ania ako ning laing
kagabhion
nakatulog na usab sa
laing katugnaw
og kamingaw

kinsa ba'y mahadlok og kahaw-ang?

sa usa ka bag-ong dalaga
idlas ang kahaw-ang sama usab sa usa ka bag-ong naulitawo
naglikay kanunay ang kahaw-ang
hadlok kini
sa kabatan-on,

apan moabot ang panahon nga ang kahaw-ang
siging hapwag kanato,

o ingnon ta na lang nga
kanako,

diha sa lawak nga walay sulod gawas lamang
sa akong pangagho
diha sa mga tingog sa kanaas
sa mga bagtok nga nagdagandagan sa
kisame,

usahay makahimo pa gani kita og sugilanon
nga kadto sila mga dwende
og puhon sila ang motudlo kanato sa gitago
nga bahandi

sud sa atong dughan diin
nagpabilin ang binhi sa paglaom

apan
diha sa dakong hawan sa kahaw-ang
diin kita nagpungko sa usa ka daplin niini
maandan ra nato kini

gani gigakos ko na lang usab kini
sama sa pagsulti
nga kamao na akong magpabilin dinhi
og sa tibuok adlaw
nagpundo lamang ang akong mga tiil
diha sa salog
og pag-abot sa gabii
gitun-an nako ang panultion sa mga bitoon

kanang tingog sa kahaw-ang nga tam-is
diha sa tumang
kahilom

samtang ang bugnaw nga hangin sa dagat
naghatod usab sa iyang
tinagoan nga awit

sud sa atong kasingkasing
adunay alibangbang nga milupad og hinay kaayong
mitugpa sa usa ka
buwak

kabahin sa iyang igsoon

sa iyang paghandom nga
mabana ang maong doktor nga niwang
morag tabili

gitahan niya ang iyang kaugalingon
didto sa baratohon nga motel
sa Iligan

og ang doktor nga ang nawong morag
dragon
mipahimulos niini

sa ilang kahugpungan sa magsoon
usa ka adlaw niana sa adlawan
sa ilang kamanghoran nga lalaki
iyang gipaila-ila ang maong doktor
nga ang wait baga
morag panit sa kabaw

pipila ka bulan miburot ang iyang tiyan
apan ang doktor miyam-id kay kuno
dili siya segurado nga
iya kanang naa sa sud

ang tanga niyang igsoon
nahingangha
naglibog
nahiubos nga ang kalalom niini morag
atabay

wa kadawat sa kapakyasan
nga siya
gipahimuslan lang man diay

naghikot sa iyang liog sa dakong
sanga sa punoan sa mangga sa likod sa
ilang balay

og siya namatay.

ang giawayan ni mama og ni mrs. a.

ang nakapabukal
sa dugo ni mama kaniadto
sa dihang
nagmaestra pa siya sa Minang
mao si mrs. a.
nga miingon nga ang among balay
sa Olingan
morag balay og kukok,

wa kapugong
naglayog silang duha didto sa Purok
nga morag mga
manuroyay og isda

wa koy gilabanan
apan mihilom lang ko didto sa daplin
samtang naghilak

kon bout sutaon
bisag walay labot si mrs. a. sa among pamuyo
sa way pagdapig
nagsulti lang pod baya siya sa tinood.

ang naglibog

imo man god
nga gitan-aw
mao nga dili ka
makahukom
kon asa nila ang
angayan,

sulayi kuno og
simhot
o halok o kon dili
ka pa gihapon
makakaplag og
kaisog kay
anaa pa gihapon
ang duda
sa kaikog,

sulayi kuno og
tilap sa imong taas
og pula nga
dila,

ayaw lang og
tam-os
ayaw lang pod
og paak,

og kon pananglitan
wala lang gayod
gihapoy nahitabo diha
sud sa imong
dughan
og kansonsilyo

palihog gawas na lang
adto ka sa punoan sa bayabas
pag-usap lang una og
udlot

dayon?

so, ok, nagpaabot si
juan
nagtulogtulog sa ubos
sa punoan
sa bayabas
kon kanus-a
mahulog sud sa
iyang baba
ang maong hinog na
kaayong bayabas...

unsa man dayon?

dili motaas ang
sugilanon kon wala
magpaabot si juan
sa pagkahulog sa
hinog kaayong bayabas
diha sa iyang
baba

dili na juan si juan
og ang bayabas dili na bayabas
kon atong usbon
ang maong sugilanon

pasalamat sa magbuhat niini kanako

adunay gustong mopatay
kanako
nagpahipi sa likod sa
punoan sa mangga
iyang gipunting ang iyang
kalibre kwarentay singko
sa akong ulo

miatubang ko niya
og akong giduol ang iyang
kwarentay singko
og akong giukab ang akong
baba aron akong kan-on
ang iyang mga bala

iyang gipadayon ang
pagkablit sa gatilyo
og ako nakaikyas na sa
akong lawas

og karon ibilin ko kini kaniya
nga nakaligo sa dugo nga gikan
sa akong utok nga miaagas
gikan sa akong alingagngag
lapos na sa buho diha sa akong agtang

pakapinan ko kini og usa ka
kinasingkasing nga pasalamat
kay ako wala nay gikawilihan
og nasayod ako sa akong padulngan

kabahin sa patay nga champaca

namatay
ang punoan sa
champaca

apan bisan og
wala na ang mga bulak
og dahon

nindot gihapon
kining lantawon
sa dihang gibatogan
ang mga sanga niini
sa daghang mga
tamsi

bana og asawa nga wala'y anak

wala gisung-ay
nga bata ang bana
apan sa matag gabii
adunay gahambin
sa iyang kasingkasing

wala gitimplahan
og gatas ang iyang asawa

apan aduna'y madungog ninyo
gikan kanila

usa ka nindot nga
uha

nga mugna
gikan sa duha nila
ka balatian

ang kabahin sa gunting

bisan nagdaot siya
hubag ang iyang tilaok
dunay hilanat
gakurog ang iyang lawas
og sakit ang iyang ulo
mibangon siya

tungod kay ang gunting
bout makigharong kaniya
og gusto niini nga isugilon
ang kabahin sa
usa ka tinabas

miingon ang gunting
nga adunay bata nga lalaki
nga sa unang paghibalag sa gunting
kini nalisang
og midagan

nakasabot ang gunting
mitago una kini
apan mipakita pag-usab
sa dihang nahamtong na
ang bata

sa ikaduhang pagpakita sa
gunting
nga karon haskang haita na
hapit maghikog ang
maong tawo

wala'y nakasabot sa iyang
kahadlok apan ang gunting
nagpailob lamang

wala na ang tawo nagpakita
sa lungsod
ang iyang tingog nahanaw
apan buhi siya sa
usa ka balak

miabot ang panahon
sa lain na usab nga pagharong
nagkita sila sa gunting
usa ka gabii niana
og iya kining gisukmat
apan ang gunting
walay giputol
walay gitabas

nakatawa ang maong tawo
nga karon nakabaton na og kusog
diha sa usa ka kinaadman
sa mga tanghaga

sa kangitngit giusab niya ang iyang
nawong og lawas
giwala niya ang kanhiayng nawong
sa bata
nga puno sa kahadlok og kalisang
kadtong aping nga luspad
pulapula na
og kadtong tingkoy nga mabaw
milalom na

karon ang iyang pagpanimalos
miingon siya sa iyang
kasingkasing

pagkaugma
gihawiran niya ang gunting
giputol niya ang iyang tudlo nga
singsingan
og miagas ang daghang
dugo

mipasiyo siya sa patag
og iyang giingnan ang mga nanuroy didto
nga wala na siya mahadlok
sa gunting

iya kining gitagkosan og
gisul-ob sa iyang liog
samtang ang gunting migilak
sa kahait

og sa kusog niyang katawa
nga nadungog sa tibook lungsod
miingon siya
nga siya og ang gunting usa na karon
dili siya ulipon niini
og siya dili usab agalon sa maong
talinis nga butang

gihatag niya ang pahiyom
samtang nagpasad ang daghang
dugo sa dalan nga
iyang gibiyaan