pagtul-id sa hiwi nga sanga sa usa ka karaang kahoy

nagkita mong duha
dagko na ang inyong mga bukton
lig-on na kaayo ang inyong mga
bukog

kon itul-id mo ang hiwi
mapiangan siya
kon birahon mo ang iyang
bukton
aron taralon mo sa imong
gihunahuna
dili mogamay ang iyang
mga bukton

pakyas ka lamang kon ang imong
tumong mao nga
siya imong usbon

daghan nang kahoy ang giputol
tungod sa  kausaban

unya kon imong lantawon sa layo
makaiyak na gayod ang mga higayon

pagsulti mo sa wala

gipangutana ka niya
kon unsay imong ikasulti bahin ato,

wala kay ikasulti matod mo

gisulti mo ang wala ug mao kana
ang akong nasabtan

giunsa mo ba pagpatay ang usa ka balak?

giunsa mo ba pagpatay ang usa ka balak?

gihimo mo siyang usa na lamang
ka sugilanon

giputol mo ang duha ka pako sa
usa ka alibangbang

gibira mo ang tabanog balik sa
usa ka nilokot nga lambo

sa imong duha ka kamot gisikop
mo ang tanga ug imo kining gipidyat

gipatay mo ang hangin ug ang
balak wala nay ginhawa

ning kapalaran

ning kapalaran

ang mga numero sa kalendaryo
nanghadlok kanimo

matag pahina nagbaton kinig
pako nga kusog kaayong molupad

ang mga panahon gilukot sa mga
badlis sa imong kapalaran

kon tulisokon na ang imong tanlag
sa mga nangagi

kalit mong gipakli ang mga katuigan
ug miingon ka, gikalimtan mo na ang tanan

pagsakay nako ug taxi sa jones street

bold ang talk sa driver
sa dihang mihunong mi kadyot sa red traffic light
dunay babayeng seksi nga dakog totoy nga minaog sa jeep
unya nagpanilap ang driver
nga itomon unya dunay peklat ang iyang aping mga murag
natakbasan

ambot ug unsa pod kaha ang tinagoang estorya
sa iyang kinabuhi

mitapot ang iyang mata sa dughan sa babayeng pution
unya midugang ug bungat:

kalaming kumuton kong mapalit pa unta

wa pabangbang, daghan dapit sa mango avenue ana
sahay, maot, dugay kong magawsan, dili na nako i lips to lips
totoy na lay banatan ug kumot

nganong gihimo man god sa Ginoo kining totoy
sa mga babaye? maoy iyang pangutana

namati ra ko, gipauyunan nako ang driver nga
morag bilar pa sa iyang pamasayro kagabii

gilantaw nako ang iyang nawong
walay hilam-os
daghang buho ang aping
baga ug wait
insikon ang mata

sa pagkanaog nako sa taxi
wa nako pakapini ang plite
mora kog nalooy, mora sab kog naulaw

BALAK ALANG SA PANAGTAGBO SA DUHA KA DILA

kon sutaon jud
sa usa ka dugay nga tutok
actually
maot ka,

pangit. Ang imong duha ka kilay
nagtagbo nga morag gaaway,

baga ang imong pikas ngabil
unya ang imong buhok nga dunay
mga split ends
liwat sa imong batasan
dili dali masuta
mohapit pa ko sa daghang kalibog
ayha ko moabot
sa imong gustong ipasabot
ug buhaton

daghan pa kog ikasulti
kabahin sa imong kamaot
apan dili ko na kini taason

kabalo kong baga kag nawong
dili tigtagad ug estorya
dili mag-ambat aning ginagmayng
kisaw
nga ug ikaw pa
petse petse lang kini sa
gamayng kinabuhi

lami pamation nga dili man gani
nimo ni basahon
unya masina ko nimo kay ikaw
dili gayod dali masakitan

isog ka, banggiitan sa hugna
sa kasakit

misamot kag kamaot kanako
bahin niini
kanang dili ka sensitive
sa gibati sa uban

apan kagabii
sa dihang gipalong na ang suga
unya
nagdula ang atong duha ka dila

ang ako sud sa imo
unya ang imo sud sab sa akong
alingagngag

wa baya tang duha katingog
sa hilabihang
kauhaw nato sa atong mga laway

ugs sa dihang gipiyong ko ang
akong mga mata
adunay miabri nga mga gapnod

misulod tang duha sa ganghaan sa langit
ug nakapang "o my god tang duha"
human hapit ta malumos sa atong
duha ka ginhawang
gitagotagoan sud sa atong
mga dughan

unya ako
bahalag dili ka motoo
sus ginoo!

nakita gyod nako ang iyang
nawong

SA DIHANG NABALITAAN NGA DUNA NA SAY GIPATAY SA DIPOLOG

" Way kalooy!" maoy hukom
sa misimpatiyang mestisa,
berdugo,
"kon sila kahay buhatan sa ingon,
lalim kaha?"

adik adik daw,
tinood ka?

"mas maayo pod nga gipatay,
aron malimpyo ang
katilingban", miantog ang itomong
babaye
contra sa mestisa,

" dapat motagam
kining mga pusher,
aron dili mosanay!" sumpay niya.

time sa, kinsa ba ang gipatay?
ug ngano?

"unsay probable cause ana
judge Chad?" dunay nangutana.

mga tigmo sa pinatyanay
sa gamayng syudad
mahusay pa kaha?

daw

aduna na pod daw gipatay
atubangan jud sa capitol
broad daylight
giulo daw
hay-ad jud sa karsada
unya ang asawa naglantaw
apil ang anak
wa jud katingog

this city is no longer safe to live
maoy ingon sa nagbalita