sa buhi pa si nang peping didto sa ilang balay sa lapasan

 

 i

sa gamay pa kuno ako
naulawan ang akong inahan

duro daw nakong tutok
ug pamuyag sa nipa nga
atop nga gatulo

sa bongbong nga kawayan nga galapos-lapos
ang hangin

sa salog nga siak ug gabok
sa haliging gahirig

sa nataran nga nanimahong tae sa baboy
sa gamayng agianan nga lapokon


ii

sa buhi pa si Nang Peping
gipakita niya kon unsa ang nawong ug lawas
sa kapobrehon

apan bisan pa sa maong
kahimtang
gipadayag usab niya
kon katinood nga balayng malipayon

diha sud sa nakadawat nga
kasingkasing

ang hirig nga haliging kamaong mosayaw
ang gatulo nga atop nga sinugdanan sa usa ka balak
ang mga ugang dahon sa nipa nga kamaong moawit
ang siak nga haliging nakat-on sa
agak-ak
ang gamayng agianan nga nalapok tungod
sa pagdula
sa mga batang siaw
sipat 
ug malipayon

sa sitio sa Gata

nindot ang kabuntagon
mibuswak ang
mga kalachuchi

gipamunit ni rosing
gihimong korona sa
iyang ulo


pagkahumot sa kagabhion
nanurop sa kaadlawon

lunhaw kaayo ang mga
balili
samtang naglingkod sila
tupad

ako lang kining
nahinumduman

gikan ang atong kaliwat
didto

nadungog mo ba ang
mga pahibalo

nga sila nahimo na nga
mga tulisan?

giputol na ang punoan
sa kalachuchi

gianod na usab sa dakong
baha

ang balay nga karaan
ug ang yuta nga kabilin

hagbay rang nabaligya
busa

wala na'y hamdumon
kitang tanan napapas

ang sitio sa Gata
usa na lang ka upos

sa dahon sa lumboy
nga nilikit ni Laloy.

tunok sa akong dughan

midungaw ka sa akong
bintana

abi mo ug usa ka ka
lamdag kaayo nga bulan

gianinag mo ang akong
katulugon

nindot, malinawon
maaghop

mibangon ko
gustong moabi-abi kanimo

mitiklop ka
sama sa usa ka udlot sa rosa

gitukob ako sa kangitngit
apan wa na ako matingala

kining tunok sa akong
dughan
ugma, managhan

pahinungod sa usa ka higala nga nasina sa akong kahimtang

usahay
gipatay ko ang kadasig

kadtong migitib sa akong
kasingkasing akong gilukat

daghan na ug patay nga
dahon

ang mga udlot puros
naputlan

wa ako miiyak sa ilang
mga kamatayon

gikinahanglan ko kining
buhaton

aron ako mamahimong
dungganon

bisag dili malipayon
basta halangdon

mas nakita mo ang akong
pahiyom

kadtong didto na ako
sa sud sa akong lawak

bisan gani didto sa likod
sa balay

kon nakakita ka pa lang
imo untang masuta

nga dili mo ako
angayan nga kasinahan

dinhi sa atong dapit

wala kunoy gahi
nga pan sa init nga kape

apan, dinhi,

dili init ang kape
gani wala nay kape

dili lang sa humok ang
pan
wa na gayoy bisag usa na
lang ka
pan

busa kay bato man lang
ang ania

sulayi kuno
ug ingkib?

giawit ko gihapon ikaw sud sa singkwenta ka tuig

sa akong damgo usa ka hapon niana
sa akong kakapoy

miingon ka, "hawiri ko" kita nakong gianod
ka sa akong
paghikalimot

wa kong kahawid nimo
luya kaayo ang akong mga kamot

sa pipila ka tuig 
nagbasol ko

tinood, sa wa nako paghawid nimo
mora na sag gibudhian ta ka


naghimo kog laing dalan
laing ikaw

sa akong panumduman 
kanunay

niadtong higayona mibalik
pagbatog
ang mga uwak sa layog nga punoan sa
lubi

mihunong ang ulan
nahilom ang suba nga bag-ong gibahaan

ako ang mibiya
nagpalayo

apan sayod ka
giawit ko gihapon ikaw

hulagway sa 1978, chocolate hills, bohol

tan-awa ning atong larawan
kitang duha sa Carmen
sa taas sa bungtod

gamug-ot ka sa kainit
mipahiyom ka gamay sa akong aghat
apan sus ginoo
pagkahilaw, 

aslom, 

mora kag manggang hilaw
nga gapatubod gihapon
kanunay
 sa akong laway

ikaw ug ako
diha sa ginagmayng lamas sa kinabuhi

hilaw ug
aslom

namahala diha sa gugma

kabahin sa mga artista

alom ra sa aping
ang dag-anan ni nora
sa kulong nga
buhok ni
vilma,

si manuel
haskang sukoa
nganong ang buhok
ni vilma
gipamub-an

lalom pa's
atabay ni Ibyang
ang
tingog ni Nora
unya ang kang Vilma
sab
hait pa's
dagom

natigulang na si manuel
unya ang iyang
kontra nga si
teodulo nag-aduy-adoy

si vilma bata pa gihapon
lantawon
si nora
wa gani kaila kon
kinsa si
dulo.

dili pa ako andam higala

Ingna ako ayaw

Nga sa usa ka halok sa imong uyab didto's Mias

Makita mo na kon unsa ang kinahayagang

Pagsalig

ang kinalamiang lami

diha sa pagbati

Ingna ako ayaw nga diha sa usa ka pagpaak sa usa ka

Tamboboan lamang

Mahibalag mo na ang 

kataposan

Tanang kahimangha ba diha lamang sa usa 

ka kasingkasing?

Sa usa ba lamang ka kinhason 

manghambog ka nga nailhan mo na ang

Dakong suba?

Ug diha sa usa ka lugas nga balas sa dagat 

isulti mo kanako nga

Nabatyagan mo na ang 

tibook kapupod-an?

Pasabta ako ayaw niini

Kay dili pa ako andam nga ako mahisama kanimo nga ilang gitawag og

Buang.

kabahin kanimo

Sa pagkatulog sa ngabil

Pag-abot na sa saktong panahon

Mobangon ang pulong

Sal-on kini sa usa ka mensahero

Nga walay kakapoy

Wala  na ang shagit sa protesta

Patay na usab kasamok

ang kusog nga tawag kabahin sa

Usa ka rebolusyonaryo

mawala..