ang mga namuthong uhong

sa akong pagpauli human sa kusog nga dalugdog ug kilat
nalabyan ko ang mga namuthong uhong sa daplin sa kasagingan
kaganihang kaadlawon

pagkadaghan sa mga puting uhong nanggawas sa yuta
morag mga ulod nga nagtabang sa usa ka patay nga iro

ingon ang akong silingan nga ang bana gipatay sa mga NPA

"nanggawas na ang mga puting tudlo gikan sa ilalom sa yuta
adunay babayeng nagbakho sa ilalom sa mga unas sa saging"

paghandom kaniadtong 1976

buslot na ang tiyan sa karaang baroto
ni tatay nga gipasagdan na lang sa daplin sa baybayon
sa silong sa kalubian

si Peryong usa sa mga bosero hubog nga naghay-ad sa
balas tupad sa usa ka basong wala nay sulod nga nagdala pa sa mantsa sa tuba
sa kilid sa iyang baba

dili nako hisgotan (ang maestro sa basnig nga si xxx nga unsang demonyohang
napaburosan man niya ang iyang kaugalingong anak nga amang)

si tatay hagbay nang patay
ginganlan niya ang baroto sa akong ngalan


ang bungsod nga gigastohan gikan sa halin sa yuta ni nanay didto sa ozamis
gianod sa miaging bagyong Juaning

ingon ni Peryong ang dimalas sa baroto ug sa bungsod ug sa basnig
nagumikan kuno sa sayop nga ngalan nga gihatag sa baroto ni tatay

apan wala gayod mitoo si tatay.

alang sa mga magbabalak nga nagpuyo sa langit

salamat sa pag-abot
hiposa una ang imong mga pako
diha sa kilid
sa bongbong nga gikaon
sa daghang mga
anay


ihiklid ang imong hait
nga hinagiban
sa tungatunga sa balay
nga gidan-agan sa kahayag
gikan sa usa ka bitoon
nga milusot sa atop
ning balay
namong buslot

litokon mo ang mga nahisulat
sa mga habol ug mga ponda
diha sa katreng gabok
nga karaan
wala ka miari arong mopahulay
ginadili ang pagkatulog
dinhi

ang kamingaw ning balay nga
biniyaan
nakapasamad na sa daghang
mga dughan

ang mga baba namo dinhi
nanawag ug pakitabang apan
wala ka mamati
bisan ug nakadungog ka na
kaniadto pa
sa wala pa mangabot ang ubang
mga kahapdos ug kasakit nga
nakapatay na sa pipila kanamo
nga dili kamaong
mosukol sa gubat sa unod
sa ugat ug sa mga
bukog

kadugay mong miabot
busa giawat ko ang imong nawong
gikawat ko ang imong mga mata
gitilawan ko ang imong dila
gitapot ko kini sa akong alingagngag

giawat ko ang hulma sa imong
mga lapalapa aron mabati mo kon unsa
ang naa sa sulod
sa akong mga tiil ug
mga kumagko

karon masakitan ka
ug ako magsugod na ug katawa
maglantaw kanimo nga karon
dili makapiyong sa imong mga mata

maglutok ka
sa imong makita nga dili nimo katuhoan
nga among mahimong ikapahamtang
diha kaninyo

karon manghulga ka human nimog tilaw sa kapait
sa singot nga nahunob diha sa mga habol
sa dugo nga naglama sa mga ponda
sa mga sikma nga mikaging diha
sa uluhan ug abaga sa katre
ug sa mga tudlo sa tumbanan sa salog
ug sa mga haligi

basin ug mamatay ka sa kapungot
makasyagit ka sa kalagot

karon mabati mo na ang among nabati
kami nga walay mga nawong
kami nga nag-antos niining mga lawas nga laksot
kami nga naputlan sa mga kamot ug dila
ug nabalian sa mga tiil

tagbawon ka namo sa among mga panimalos
magbabalak nga nagpuyo sa langit nga
karon giputlan na usab namo sa inyong mga pako


ang inyong sipyat
nganong namati man kamo sa among mga tingog
nganong minaog man kamo sa mga panganod
nganong misulod man kamo niining
payag nga gabok ug biniyaan
nalup-og sa baho nga lapok
nabungkag nahilis ug dayog
kawagtang

kabahin sa edad

sa edad nga kinse
dakong alkanse

miabot sa baynte
siging abante

milapas sa traynta
wa gyoy aberya

pag-abot sa kwarenta
miampo, miluhod, mikanta

gitangtang ang putong
sa bukong mipatong

pagdulong sa singkwenta
di na kamaong mokwenta

pagtungtong sa saysenta
nakahinuklog siya

nangagho sa setenta
kay unta mopahulay na

gilugwayag otsenta
nagbasol siya

kapoy na ang nobenta
kalimot na siya

kapait sa usa ka gatos
nawong sa tai namusmos

ang balak sa silhig

mga niwang kaayong
mga tukog
gihiusa aron
mahimong dakong
bus-ok
himsog, taas, baga
nga binugkos

ilimpyo
sa mga upos
maghatag ug trabaho sa
mga kabos

mahimo sang ipospos
sa mga taros-taros


makatabang
sa kadaghanang
uyamot mayokmok ug
ubos ug
pit-os

para makapalit ug
mais nga kiskis

bulad nga
lapadlapad

ug ginamos nga
mawos

cantora

sa usa ka dakong unos nga binhi
natumba ang dakong lubi nga bahi

mibabag sa usa ka taas nga panon
nga maglubong sa usa ka ulipon

ang daghang mga mata sa dagat
wala namilok sa dakong katahap

gikan sa dakong batong talinis
sa ibabaw sa pangpang nga bangis

mobaha ang dakong apaw sa kangitngit
ug talikahaw gikan sa mga agit-it

mokunsad ang usa ka pispis nga awit
mangita sa mga ugang sampinit

alang sa santos (awat awat kang miltos)

kon ikaw mangambisyon nga masantos
manginabuhi ka sama sa mga sanglahon

hagkan mo ang ilang mga naputol na nga mga tudlo
itupad mo ang ilang mga tiil sa imong mga tiil

sulayan nimog bag-id ug tupong ang katas-on
ug kalalom sa atabay sa ilang mga kasakit

lantawon mo ang imong mga unod nga nangahiplos
diha sa imong mga bukog nga nangalugti

himoon mong sud-an ang ilang mga kugang
ang ilang itom nga dugo himoon mong sabaw

pagsupak sa usa ka tatak

ang eternidad molungtad kini
bisan wala ka pay isulat bahin kanako

ang mga alibangbang dili na manglupad
kon imo kining sunugon

ang imong gipatik sud ning akong kasingkasing
mangalata ra gihapon

tabangan og kitkit sa mga ulod
sama sa akong nadugta nga utok

bisan gani ang kalabira sa akong ulo
ug bukog sa akong mga tiil og abaga

sa kataposan human tilapi sa dila sa hangin
mangahimo kining abog

mahimo kining mga pangagho sa kang bisan kinsa
wala nay ngan ug wala nay hulma