nangutana ka pa?

dihay tigulang nga imong
nakita nga
nangyam-id kanimo
og ikaw nakapangutana
kon nganong
ingon ana ang tigulang
nga makaasta kanimo
nga igo ka
man lang nga nagtindog
sa silong sa punoan
sa usa ka mangga

tubagon ta ka higala

tan-awa ang mga kunot
sa iyang agtang
mao kana ang mga agianan
sa iyang darohan
nga dugay na niyang
gibiyaan

ang hiyong nga mata
dapit sa wala sa iyang
aping
mao kana ang nahutdan
og mga luha

ang iyang mata dapit
sa too nga mitutok
kanimo
mao kana ang mata
nga dili makalimot
sa imong amahan
nga nangilog
sa iyang yutang
natawhan

iya kang nakita karon
sa imong pagkamalamposon

og pagbantay baya kay bisan
sa iyang katigulangon
anaa pa gihapon ang
gitagong pagdumot
sa inyong mga mayhon