irong itom irong buang

ang irong itom anaa na usab
sa kilid sa labat sa imong balay
naghalhal

gitan-aw mo siya og siya usab
mitan-aw kanimo
gilikayan nimo ang iyang tutok
gibati ka og kahadlok
sa bula sa iyang baba
sa kataas sa iyang dila
sa iyang pagpunay
og halhal

naghunahuna ka nga
irong buang kana siya og
gusto nimo siyang bun-on sa
dakong bato aron lang unta
siya mopahawa aron dili na siya
nimo makita

apan gibati ka usab og kalooy
sa maong irong itom
namasin ka nga dili kini siya
irong buang nga kini siya usa
lang ka irong gutom
og uhaw
busa siya naghalhal
og nangita og agalon
nga mopakaon kaniya
busa nagpaabot
kini siya diha
sa kilid sa imong labat

kon masulod mo lang unta ang
iyang dughan og kon makasabot
ka lang unta sa iyang
gipanghalhal og gustong isulti
diha kanimo didto sa kilid sa
imong labat

makaamgo ka unta nga ang irong
itom usa ka
mambabalak
og ang iyang halhal gatangag nianang
daghan kaayong mga
balak