karong adlaw sa kasingkasing

karong adlaw sa gugma
karong adlaw sa kasingkasing
giandam ko na ang duha ka pula kaayo nga mga rosas
alang kanimo

duha na lang
duha na lang gayod

apan bisan pa og duha na lang
paningkamotan ko pa gihapon nga inig abot na sa oras
kon imo gihapon akong pahinumduman sa atong mga kaagi
kon imo gihapong lukaton ang akong gipanglubong na nga mga kasaypanan

akong paningkamotan nga aron ka malipay
ang duha ka rosas
basin unya og mahimo na kining upat
kay ang duha duha dili man kaha maayo kanimo

apan kon unsa man ugaling ang mahitabo
ayaw kabalaka binlan ko pa ikaw gihapon og usa ka pula
kaayo nga rosas, og kini alang lang gayod kanimo.

apan pananglitan og dili ka na gayod malipay nianang duha ka bulak
og kadtong usa nga akong itunol diha kanimo
ayaw lang gihapon og kabalaka kay magpadala ako kanimo og
mga puti na nga rosas

walo
walo na kini sila kabuok alang lang gihapon kanimo

kay ang laing usa ka pula pa kaayo nga rosas,
gipangandam ko na usab nga itunol ko alang kaniya

sayod ka
og sayod ko nga
dili na mahimo pang ipadala
o itunol
o ibilin man lang ang tulo ka pula kaayo nga rosas alang kanimo.