ang pagtan-aw sa imong hulagway

tungod sa usa ka
panghitabo nga dili
ko na angayan isulti
pa

kay sayod ko nga
nasayod ka

og unsa pa may
pulos nianang
pagpamugos

kay ang gugma
kaha
usa man ka pagdapit
lamang

og ikaw mibalibad
man

og ako nahisama
sa usa ka
suba nga nauga

og ang tanang mga
isda didto nangamatay
na man

nan
matag buntag aron
lang ako
mabuhi
kay ako man
kanang
katungdanan

lantawon ko
ang imong larawan
hikapon ko
ang imong aping
og ngabil

tutukan ko
ang imong mga mata
og ako mopiyong
og ako kang
hagkan

og ako matulog
aron magdamgo
kanimo

sakto na kana
kanako

apan bisan
pa sud sa akong
damgo

kon ikaw usa
man ka salapati
didto
dili gayod ako
maglit-ag
kanimo

dili gayod ako
maghawla kanimo

tungod kay bisan didto
nindot gihapon tan-awon
nga ikaw
salapati nga naglupad
nga malinawon
og gawasnon