sayaw una sa among kuskos

kita nga ania na dinhi
naglingkod sa atong mga hayahay
nga trono
dili angay nga manghambog
nga kita hait og salabotan
lig-on ang mga tiil og bukton
ambongan,
nga kita abtik sa pangwenta
dalayegon sa kaisog

ako moangkon nga dili ako
angayan
kon nakasulod man ako ning
akong gingharian
salamat na lang sa pagbulig
ni Bathala sa akong
kapalaran
sa laing bahin
maingon nga kining tanan
naangkon
tungod kay natun-an na
nato ang pagpuyok sa leon
nga nagbantay sa
ganghaan sa gahom
pila na kaha ang mga
taas og garbo nga iyang
natukob og nakaon?
maingon nga makamao na
kitang molitok sa
gamhanan nga mga pulong
kay napaabli naman nato
ang bungtod nga pultahan
nahigala naman nato ang
hakog nga uwak
ang mangingilad nga
agila
ang kawatan nga kanding
ang way busganan nga
buaya
ang batan-ong bitin
maingon nga kining
tanan
mahitungod lamang
sa swerte
dala ang gamay nga
pagpangarte
kuyugan sa kiting nga
kamas
kamong nahibilin diha
lantawa kami
kon angayan ba
andama ang dakong putos
sa inyong mga suka
apan samtang wala pa kini
mahitabo
sayaw una sa among kuskos
sabat lang usa sa among
mga karaang novena.
ayaw supaka ang leon
ayaw panaway sa buaya
ug undangi kog pangutana.

ALANG SA MIBALAK HALAD SA IYANG KAMATAYON

bisag unsaon
ug pili sa mga pulong
hagpat sa mga
tingog
tahop sa mga
letra
dili gayod gihapon
nindot pamation
ang hunghong
sa kamatayon

KAPALARAN

maoy ilang ingon
sa dili pa kuno mamatay ang
tawo
matalimad-an kuno niya kini
busa ang uban
manugon

sama ni Gusting
sa iyang kataposang panamilit
nga wala niya
mahubad sa iyang
kaugalingon
(kay kinsa bay magdahom
nga anang adlawa
maligsan siya sa dakong
trak ug dayon ora-ora
namatay dayon)
nanugon siya nga dili
gayod pasagdan nga magutman
ang iyang kabaw didto
sa pasto
mao usab ang nahitabo ni
Karya
diha sa pag-ingon
nga basin mao na lamang
kini ang atong kataposang
panaghibalag
dayog sakay sa barko
nga kinsa bay magdahom
nga sa kalinaw sa panahon
nalunod man hinoon og
sa kadaghan sa naluwas
ang ngalan man ni Karya
ang usa sa mga nalista
nga wa na hikit-i
sa mabaw nga dagat.

kallisti

 nag-away ang
bungi, ang pangag,
ang kimpang,
ang unano
kon kinsa nila ang
pinakagwapa
sulod sa mental
hospital

paghan-ay

paghan-ay

ang pinakamaayong moborda
mao ang pinakahilomon

pagkaanindot sa iyang mga buwak
nga hinimo sa tanod
nga iyang gimugna diha sa puting
panapton

ang pinakaanindot nga buwak didto
sa panapton 
mao ang gaduhaduha pa sa pagbuswak
madudahon sa pagkamatood sa adlaw

ang pinakaanindot nga panapton kadtong
nabordahan sa buwak nga wa pa kaayo
mibuswak nga nahawiran sa kamot
nga kanunayng natuslokan sa dagom

ang pinamaayong kahilom kadtong
hapit na iborda diha sa puting panapton
nga wala pa giluwa sa tilaok sa tanod
nga gihuktan pa sa dagom

yabag....

yabag....

sa tungang gabii gisulayan ko
pagsulat kining balak

nahikatulog ka na
ang imong nawong malinawon nga
nag-atubang sa kisame diin ang
suga hagbay rang gipalong

ang akong mga pulong morag mga
bagtok nga nagtikawtikaw sa kusina
nga sa kagutom nangita og pagkaon
namasin nga naa pay wala masulod
sa kaldero nga kasagaran imong
dat-ogan sa bairan nga bato
aron bisan sa iring dili masungkab

kabalo ka kon unsa kahugaw ang mga
bagtok nga diha sa kangitngit nahimong
mga hawod, bangis, abtik, og kawatan

ning tungang gabii gisulayan ko pagkawat
ang tanan diri kanako nga sa kanunay
akong gihipos gikan kanimo, nga ako usab
nahisama kanila, hugaw, bangis, hawod,

og walay ilhon nga balaod, bilar, laog,
igpot, og wala nako damha nga ako diay
kini sa panahon sa kangitngit, sa panahon
sa inyong mga katulugon, gani, 
nakuratan man ako, kon nganong 
sa pagsulat niining balaka, kalit lang,
nawala ako, og bisan unsaon ko pag-ila
kon kinsa ako, dili ko naman kini
mahimamat, nga mora bag ako nahimo
usab nga usa ka lamat, latagaw, 
kurimos, kulismaot, yabag, og sa dihang
may nadungog akong tunob, kalit lang
usab akong misulod sa usa ka buho,
nga karon samtang wala ako masayod,
gitawag ko kining akong kaugalingon.

pagpagarbo

pagpagarbo

ang balaod og balak
mao ang sanga og ang salingsing
nga sa bentana misungsong
sa sulog nga kahayag
nga gikan sa kahaponon

argumento de paturatoy

argumento de paturatoy

nagkatagbo  ta sa 
food court
didto's robinson
wa damha

ako ang nakauna
og kita nimo

gamay na man
diay ang imong buhok
nipis na pod ang imong
mga tudlo
morag gikagid na ang
imong liog
misamot og kataas ang
imong suwang
midaot ka diay

aron wala'y mahitabo
mikalit kog
kulitog sa akong
cellphone

bisag walay angay
kuliparon
gikulipad gihapon
anko ang keys
morag miapil kos
konsyerto ni bach

milahos ka ug lima ka
lakang
(ako gyod nga giihap)
dayon nimog lingkod
unya tindog na pod
order og sinugbang talakitok
salad nga lukot
og barbekyung humot
 
sama nako
aron walay mahitabo
maayo man o
daotan
nagpakaaron-ingnon ta
nga dili taga dinhi
unya ang tanang tawo dili nato
kaila
sama nga wala usay nakaila kanato

gansi ka kay wa ka
kadala og cellphone adtong
higayona

milantaw kos mga balod sa dagat
sulod sa akong cellphone
gilantaw mo ang bukid nga midagan
paingon Rai Rai Ken

kining atong mga garbo
mas taas pas Mt. Apo
nga bisag wa pa kita sukad
kaadto
ang katas-on ato nang
nakabisado

suma sa tambag sa akong
amigo
mas maayo nang di ta
magtingganay
aron di na kita bisan kanus-a
pa mag-away

nahisama sa ilang
panggalot nga mas maayo pag
dili na lang magminyo
ang duha ka uyab
aron dili na gayod magbulag
hangtod sa ikabaklag