sa likod sa akong abaga

suhi ang bata
nga gisabak sa hunahuna

balihon ko ang
kalibotan

aron unta mag-una
ang ulohan
ayha ang
tiilan

kini, apan,
panglantaw lamang

ang tinood
magpabiling tinood
bisan pa
ug balhinon ko
ang akong mga
mata
sa likod sa akong
abaga

sa akong kabatan-on

miabot ang balita
sa usa ka
kasubo

ako miyukbo
sa hari sa kapildihan

pagkahuman niini
migawas ako
sa iyang gingharian
ug gipanabi ang akong
kalipay

sa tan-aw nila
unta ako moiyak apan
ako nga
nakasabot sa dagan
sa panahon
nalipay nga ang akong
silot
sa pagdawat sa
nagtakuban nga
kadaugan
wala gayod mahinayon
kay siya
ug siya lang gayod
ang mas nasayod kon
unsa ang
makaayo kanako
didtong dapita diin
wala ko
pa maaninaw pag-ayo
sa akong
kabatan-on

sa sidsid sa sinina sa tumang kahilom.

adunay adlaw nga ikaw morag di na kamaong
magpakabuhi

gilumsan sa kahadlok ang imong kasingkasing
gihulmigas ang imong hunahuna

iisa na unta nimo ang imong mga kamot diha
sa pag-ampo sa imong kontra nga dili usab nimo

kaayo sinati. Apan sa usa ka pagtukaw, diin
ikaw nahigmata, nakita mo ang imong kasingkasing


nga gilangoy gihapon ang kusog nga sulog sa
kahadlok nga walay salog, ug nahinuklagon nimo

nga ikaw gihulmigas tungod kay tam-is kaayo
ang imong pagkatawo. Ang kasingkasing nga

walay kamot, mas maayo man hinoong mohawid
sa sidsid sa sinina sa tumang kahilom.

didto sa sisipus.

aron walay samok
putlon gayod dayon

aron di na motaas pa
ang estoryahon

kay ug mas daghan sugilanon
mas mokomplikado man hinoon

putlon, putlon, putlon lang
gayod dayon

papas, papas, papas na
ang tanan

ug dayog sugod na usab
sa pagbadlis sa usa ka

linya nga pulong
ingon ana usab ang sinulat

sa laing nitibo nga nakasimhot
sa ilok sa taga sisipus

aron dili kaayo nila mabantayan

matag tagsa kanato
naghambin ug mga bato sa
usa ka bakat nga
kahigwaos

sa gabii masugid mo kini
sa imong tupad nga dili nimo
kaayo kaila

pagkabuntag isul-ob na usab
dayon nato ang sapot sa usa
ka pahiyom

aron dili kaayo nila mabantayan
ang tinood nga kaguol
doblehan mo ang sapot sa pahiyom
sa usa ka mas baga pa
nga buhakhak

ug kinsa pa ba'y motoo nga kitang
tanan
pareho ra diay ug mga bukog
nga nagtakuban ilalom sa panit
sa atong tagsa-tagsa ka mga
dughan?

ang laing nawong sa akong kaugalingon nga karon nagpaila na kanako

sa milabay nga panahon
usa ka adlaw niana
sa akong kiliran adunay
laing nawong nga mipatim-aw
ug kanunay nga gahunghong
sa akong dalunggan nga
ako kuno kadto siya
nga kanunay kong gitagoan
ug gibiyaan

akong gilantaw
wala ako masuko
akong gihikap ang
iyang aping nga
basa sa luha

ug ako siyang giingnan
karon kuyog ka kanako
dalhon ko ikaw sa dapit
nga imong gihidlawan
ug ako ikaw nga pasagdan
nga magdula didto sama
sa usa ka bata
ug ako ang magbantay
kanimo diha sa usa ka
pagsabot nga lalom pa
sa imong pinuy-anan nga
kahilom sa lawod ug
mga panganod.

talikod lamang

ikaw nga pirming
gatalikod kanako ang
gihangpan ug kanunayng
gigakos sa akong
kagabhion

ang akong mga tiil
patong sa imong paa
ug sa dihang gihikap ko
ang imong kasingkasing
sa akong duha ka palad
gisapo mo ako
ug imong gibalhin ang
akong mga kamot
didto sa imong pusod.

ang baga nga libro kabahin sa disgrasya sa gugma

ang usa ka lawak sa usa ka
disgrasya
diin kamo nagkita ug nagdulog
nga wala damha
nga kini diay gikulit man kaha
sa tigib sa kapalaran

mahimong usa ka baga nga
libro nga bisan kanus-a
wala gayod masulat ug karon
nahipatik na man hinoon sa
atong matag palad kitang
nahinanok tungod kay sa
miaging gabii wala man kitang
duha mahikatulog

unya kining libroha diin atua
ang atong mga sayop nga ngalan
atong gidaladala bisag asa
dili tungod kay kini atong basahon
apan aron unta walay bisang usa
sa atong mga kaila
makabasa sa maong disgrasya
ug unya manugilon sila kabahin
sa hiwing pagbati nga kanunay
gisapsapan sa atong katilingban
ug gisunog matag tak-op sa
hinatag nga kahayag