alang sa amigo nga gustong magpakamatay

kon mangutana ka
unsaon paghuman ang kinabuhi
sama ra usab nga nangutana ka
kon unsaon paghuman
ang usa ka sulatonon nga dili
mo man gani masugdan

gusto mong magbangutan
diha sa usa ka gugmang kanhiay
rang napan-os nga karon
nanimaho nang patay?

pagkalooy mo

mangatawa ang mga tiki sa kisame
kon mahibaw-an nila kini
ug ang mga lamok nga matabian nila
niini makaingon nga tinood jud
diay nga ikaw
dili pak-an

kon imong taposon ang kinabuhi
sa usa ka pagtoon
pinaagi unya sa usa ka kauhaw og
kagutom
diha unya sa imong lubog
mohunghong ang tigulang nga babaye
sa usa ka tigulang usab nga lalaki

"pagkabayot ba niining namatay
pagkahuyang sa iyang galamhan
pagkadaghan pa untang buluhaton
pagkatam-is pa unta sa kinabuhi
pagkalapad pa gayod sa mga lawod
pagkadaghan pa sa mga isla ug
kabukiran
pagkaanindot sa mga buwak
pagkalami sa hangin nga bugnaw
sa baybayon"

ug dayon nilag labay sa bato ug
buwak diha sa imong lungon nga
karon mokuyog kanimo sa
imong gipili nga katulugon

ang imong iro nga gibiyaan
anaa naghalhal ang dila
nagpaabot kon kanus-a ka
mobangon
aron makigkuyog kaniya ug
lakaw diha sa daplin sa
baybayon

alang kang sa mga sum-od nga yawit ni sara

napura ko sa kang sara
kabahin sa mga dahon sa agosto
sa mga adlaw sa mayo
lahos sa gisugdan nga kainit
sa kamatyonon nga
mga adlaw sa abril

gikapoy ko sa kasum-od sa
awit sa dagat
sa mga balod nga nagbalik-balik
sa gatanga nga tutok diha
sa baybayon

sakit sa dughan ang walay puas nga
pagtagaktak sa ulan diha sa atop sa
atong balay
nga sin nga morag mga tikang sa
pagsugod sa mga kaulag sa iring

mosulod ko sa lawak manirado sa pultahan
puslan man nga kining kasingkasing
punay mong samdan
sulayan kog ampo ang kahilom
aron mapusa kining itlog nga akong
gipakatulog sa kainit sa lumlom

balak alang sa kaulag nga nagtakuban nga gugma

ako ang balod
luyo sa imong balod
sundon ta ang ritmo
sa atong kiyod

ihapnig nato ang atong
mga kamot
sa abaga sa sofa
ang imong mga kamot
ilalom sa akoa

pagkaanindot lantawon
sa samin ang mga kandiis
sa akong sampot

takilid gamay
gusto nakong dakpon sa
akong dila
ang imong dila

kini ang sakay sa sakayan
sa gugma
ako ang balod luyo sa imong
balod
duyanon ta ang kiyod sa atong
kiyod
diha sa lalom nga kandiis
sa atong mga sampot

ang subm-od nga hagawhaw sa mga balod sa baybayon maoy duyan nga muyogyog na usab kanato sa katulugon

ang kalimot gamhanan
nagpasalamat ko nga gikalimtan na
ang tanan

sa akong pagbudhi
kalimot ang tambal sa mga sakit sa samad
nga imong gibati

kon dunay mosusi diha sa panugilon
diha sa panagsuod
ingnon mo sila " asa god ato?"
dayog ingon "nakalimtan ko na
kay dugay na kaayo"

bisag anaa pa kini nakasulat sa imong
panit
unya gangutngot pa gihapon ang mga
paak sa pulang hulmigas

gikalimtan ko na usab ang labawng
kalipay
nga gibati ko kaniadto nga wala ko
gibati diha kanimo

kon gisakitan ka gisakitan usab ako
ug kon akong handomon sa makausa
pa sa usa ka aghat diha sa kahidlaw
ako ang usab moingon sa akong kaugalingon
"asa god ato? gikalimtan ko na kadto
kay dugay na kadto kaayo"

lingawon ko ang akong kaugalingon sa
pagsud-ong sa kahaponon diha sa pag-usob
usob sa bulok sa adlaw nga misubang-misalop
unya ang subm-od nga hagawhaw sa mga balod
sa baybayon maoy duyan nga muyogyog na
usab kanato sa katulugon

sa lain na usab nga unang gabii sa atong gugma

kagabii
mao ang atong unang panagdulog

sa dugay nga panahon
gitukod nato ang mga labat sa adlaw
ug kagabhion

taas nga labat, sementado nga
bongbong
baga, dayon ang dagat dili na
makita

kagabii gibulag kita sa usa ka
alugnan
unya ang atong gipabati sa atong
dughan
mao ang tumang kahilom

nagkapakapa kita diha sa
kangitngit
gipangita nato ang kainit sa
atong mga kamot
kay gusto nato unta kining
hawiran

kagabii
gikalipay nato ang hagok sa
katulugon
ug didto sud sa lawak sa atong
mga damgo
gisabat nato ang taas nga
pangaliya

ning sayong kabuntagon
wala mitugtugaok ang sunoy
nga giputlan na ug liog
sa atong katabang
alang sa atong panagsalo
sa usa ka tinola
unya dapit kon kita mangmata
ug mohigop sa init nga sabaw
isip pasalamat
sa lain na usab nga  unang gabii
sa atong gugma

magsugod na usab ug sulat kabahin sa akong agianan

lahi ang sayong kabuntagon karon
ngitngit
unya kusog ang ulan

masulub-on kini sama sa usa ka
byuda nga bag-o  lang
naglubong sa iyang bana

ang tingog sa ulang sama sa usa
ka danguyngoy
sa usa ka bata nga gutom ang
tiyan ug walay pamahaw
ug diha sa ilang balay wala pa
ang mga ginikanan

ang mga gabigabi morag mga iring
nga nangabasa
nga piso nga wala nay inahan
ug nagkurog sa daplin sa labat nga
kawayan

ako ania, naglingkod sa silya nga
uway
nagdungaw sa bintana
namati, naglantaw, nangapkap
sa pulong
ug unya kuyog sa kapuol magsugod
na usab ug sulat kabahin sa akong
agianan

ikaw nga nagmalipayon

gihigugma mo siya
ug gihigugma ka niya

mao kana ang kalipay
nga makaaghat nimo ug
kanta duyog sa mga bitoon
sa langit hangtod na sa
pag-abot sa kahayag sa
adlaw hangtod na usab
sa lain pang moabot nga
kagabhion

mosayaw ka silong sa
mga kakahoyan
moambak
mag-ambaya sa gugmang
gisalohan sa inyong
duha ka kasingkasing

ako nga maglantaw
malipay usab apan dili kini
molangtad kay inig pauli
ko sa balay sa akong kasingkasing
wala ang akong gihigugma didto
ako lamang usa sa sulod sa
lawak diin sugdan ko na usab
ang pagtapak sa mga gising
sapot
sugdan ko na usab pagtambal
ang mga samad
nga walay pagkaalim
unya di na kamao unsaon
paghulma sa mga
ulat

kay sama mo nga nagmalipayon
ako nga nagmasub-on
kamao sab gihapon nga molakat
sa kinabuhi

gihigugma ko gihapon kini
bisag wa na kini mahigugma kanako

misimang ako, ug mihunong dayog biya sa lugar

kon ako magpaabot
ang gadulong makita ko
na unya andamon ko na
ang tanan:

una ang akong
kaugalingon,kinahanglang
walay iyakay,

ikaduha ang garapon
nga gisudlan ko sa akong
mga nahibiling pangandoy
kinahanglang dili gayod
kini mabuak

ikatulo mao ang pultahan
ug hagdanan, kinahanglang
lig-on aron walay maglisod
ug abri, walay maglisod
ug tikang,

nagdulong na ang mga
pulong sa pagbiya unya ang
akong baba nangandam na
sa pagyubit niini,

layo pa apan makita ko na
ug akong gibati ang sama
kaniadto sa dihang miapil
ako sa lumba sa dagan unya
didto sa tungatunga na


misimang ako, ug mihunong
dayog biya sa lugar
palayo sa mga tawong
andam na untang mopakpak
sa akong kadaogan.