mY secreT ponD

upat ka babaye
ang nagkumpayot sa akong nawong
mitaop ang usa sa akong agtang
ang ikaduha nahimo nakong dunggan
ang ikatulo nahimong
ilong nako
ang ikaupat akong tilaok

tan-awa ako sa layo
anaa ang akong hulagway
ang akong nakita,
nasimhot, giisip
gitulon, gilad-ok
gitilawan

ang mga babaye,
wala magubot ang akong kalibotan
didto sa akong mga tanaman
sa mga bulak og mga dahon

gihimo ang akong mga bukton
alang kanila
ang akong kahaw-ang ang akong
mga bintana sila lang
ang makahulip

sila lang ang makapilo sa akong
mga habol
sila lang ang makatapak sa
nagisi kong kasingkasing.

lipayon nila ako bugti sa
paglipay ko kanila
labaw pa sa panagsuod og
sa panagsoon

sila mismo ang nangutana kang
Bathala, nganong usa ra si
Eba nga gilangkat gikan sa
gusok ni Adan?

dili lang kalipay ang kalipay
katungdanan usab kini sa paglambo
sa mga kabulakan didto sa
paraiso nga tanaman

gugma, dili moralidad ang sukod
sa kagawasan sa kalipay sa katunhayan