mas nindot ang mga tanghaga

ang tigmo mas nindot kaysa iyang tubag.
kay og matubag na ang tigmo mamatay na kini
ilabay na kini, og ang laing tigmo nga dili nimo
og wala nimo matubag mao na usab
ang mga tulay nga gilapasan sa dakong baha
sa mga damgo sulod sa imong kagabhion.

sama sa babaye, gusto nako nga siya usa lamang
ka tigmo nga dili nako matubag, aron kanunay
siyang kuyog sa karwahe sa akong mga hunahuna.

mas nindot tan-awon ang babaye nga aduna
pay panty og bra, kaysa kadtong atong gihuboan
nga pati gani ang iyang kalag misihag na sa iyang
tabonon nga panit.

mas nindot ang mga bulak nga aduna pay dahon.
ang mga sanga nga anaa pa ang mga tunok
ang punoan nga anaa pa ang mga sanga
mas nindot silang tan-awon kaysa usa ka gihay
sa bulak nga rosas
nga anaa nag-inusara sa imong palad

mas nindot ang pagtabon-tabon sa mga parte sa lawas
nga makapagilok sa atong balatian
ang T-back ang bikini ang bra nga mora na lang og tanod
sa mga atngal, ang dahon sa antulanga nga anaa sa tunga sa bilahan
mas makapautog sa atong mga handurawan

mas nindot kadtong nagtapis nga wala tangtanga
samtang misayaw ka sa akong atubangan
mas nindot ang mga maskara nga mitabon sa imong mga mata
mas nindot ang agtang nga dunay bangs
mas nindot ang mga sida nga panamton sa imong mga paa

og usab, karon mosulti ako sa walay pagdikidiki
mas nindot usab ang mga ginagmayng tabon sa atong pagkatawo
sa atong pakighilawas sa atong hinigugma
ang mga misteryo ang mga gabon ang mga balahibo
mas nindot tan-awon ang mga bolbol kay sa mga kinagisan
mas matinooron kon akong dawaton ang mga laso
ang mga kurdon, ang mga asintos

sa akong mga bakak nga akong gitagkos sa mga kamatooran
nga akong gidugtong sa akong kamot og balatian

lami usab ang akong mga ginagmayng bakak nga imong tuhoan
dili ra kaayo sakit kon ako imong masakpan

mas malipay ka kon dili ako moangkon
bisag nadakpan ko nimo nga nagpatong sa akong kamabudhion

kay ang tinood nga nahigugma bisan sa mga bakak sa iyang gihigugma
tam-is gihapon kana alang kaniya, lami gihapon siyang tam-oson
surop gihapon ang iyang mga dugos sa iyang halok
sulod sa imong baba
nga gigakos og hugot sa imong dila.