mY secreT ponD

gusto ko nga dili lamang
ako nimo higugmaon
gusto usab nako nga ako
imong magustohan
dili lang ang akong kalag
kay dili mo kana makita

tinood imo kanang mabati
diha sa pagpiyong sa imong
mga mata og paghalok nimo
sa akong mga ngabil og
paghikap nimo sa akong
pusod kon palungon na
nato ang mga kahayag

apan moabot ang panahon nga
gusto nakong ako imong pahimuslan
sa tunga sa kahayag sa adlaw sulod
sa atong lawak nga dan-ag og walay
kukaulaw nga kita maglantaw sa
atong mga tungatunga og kiliran

gusto ko nga kon ako mosulod sa
imong mga taguhala anaa ang
tumang kahayag diin ang akong
mga mata magpista sa mga tanaman
nga iyang makita: mga bulak mga
kakahoyan, mga lanaw, mga alibangbang
mga sagbot, mga balilihan

gusto ko nga kon ikaw mosulod sa
akong kasingkasing anaa ang bulan
og mga bitoon nga mikidlap isip
mga saksi sa mga kahibudngan

dili sa tanang panahon sa latas sa
atong gugma nga kita magpiyong lamang
naa ang adlaw sa mga tutok og paghiyong
sa tumang kalami og pagdaghong

gusto nako nga madungog nga ikaw
mag-agulo og motawag sa akong ngalan

og busa ania ako, nagtindog sa imong
atubangan, gustong tumanon ang akong
mga gidamgo, huboon ko ang tanan
sa tumang kahayag, magpista ang imong
mga mata, magsadya, kanang kita rang duha

molanog ang mga kampana sud sa atong dughan
atua ang mga rebentador sa tumang kahilom.