ang kalibog sa gamayng bata

daghang mga kamot
anaa ang mihapohap
sa iyang ulo
anaa ang naghawid
sa iyang abaga og
liog dapit sa likod
sa iyang dughan

mihawid siya sa
mga kamot sa
iyang inahan

apan kutob ra
kini karong adlawa
kay pagkaugma
magpalayo na ang
iyang Nanay

"balikan ra ka
nako puhon, anak"

gibilin siya sa ilang
silingan nga walay
anak,

nadungog ko
kagabii ang iyang
tyabaw

sa kadugayan
nahutdan sa
tingog nakatulog
sa salog

nagdamgo siya
sa usa ka
palasyo sa
panganod diin
didto nakigdula
siya sa daghang
mga bata

pulos mga walay
mga inahan.