ang awit sa itik

awitik, ang awit sa itik
gansawit ang awit sa gansa

usa lang ang ilang buot ipadungog kanato
ang kataposan sa atong pagpamalak

ang kamatayon sa atong mga pulong
ang paghagsa sa atong mga silaba nga
daw sama sa mga gihay sa rosas nga
naughan og tubid sa usa ka plorera

nadungog ko kini sa makausa
sa makaduha, sa makatulo hangtod sa kanapulo

migawas ko sa pultahan anang pagkapalong
giwakli ko ang mga awit sa kamatayon

gihawiran ko ang bato sa kinabuhi
gipaturok ko ang mga liso sa paglaom

gilantaw ko ang usa ka itik nga naglangoy
palayo kanako, pagkamalinawon na niya

nalipay ako, naghandom nga unta wala na
akoy kataposan...Apan dili kana tinood

kay ugma sayod ka, sayod ko nga madungog
ko na usab ang mga awit sa mga gansa og mga itik

usa sila ka panon, labaw sa napulo.